مۋزەي-قورىقتارعا باراتىن تۋريستەر سانى ارتىپ كەلەدى

استانا. KAZINFORM - رەسپۋبليكالىق جانە وبلىستىق مۋزەي-قورىقتارعا باراتىن تۋريستەر سانى ارتىپ كەلەدى. بۇل تۋرالى تۋريزم جانە سپورت مينيسترلىگىنەن ءمالىم ەتتى.

«قاراۋلارىندا تاريح جانە مادەنيەت ەسكەرتكىشتەرى بار رەسپۋبليكالىق جانە وبلىستىق مۋزەي-قورىقتار سوڭعى جىلدارى كەلۋشىلەر سانىنىڭ ارتىپ وتىرعانىن اتايدى. ماسەلەن، بەرەل قورعاندارى، تامعالى شاتقالىنداعى ارحەولوگيالىق لاندشافتتىڭ پەتروگليفتەرى، اباي مۋزەيىنىڭ وبەكتىلەرى، وتىرار قالاشىعى، اقىرتاس سارايى كەشەنى تۋريستەردىڭ ۇلكەن قىزىعۋشىلىعىن ارتتىرىپ كەلەدى. سول سەبەپتى كەلۋشىلەرگە وڭتايلى جاعداي جاساۋ ماقساتىندا 2019-جىلدان بەرى تاريح جانە مادەنيەت ەسكەرتكىشتەرىنىڭ اناعۇرلىم شوعىرلانعان جەرلەرىندە ۆيزيت-ورتالىقتار سالىنىپ، بۇگىنگى كۇنگە ولاردىڭ 4 ءى (تاڭبالى، ۇلىتاۋ، وتىرار، سارايشىق) ىسكە قوسىلعان، 5 ەۋى گاۋحار-انا، ورداباسى، ەسىك، ساۋران، بوزوق) قۇرىلىس دەڭگەيىندە»، - دەپ اتاپ ءوتتى مينيسترلىكتەن اگەنتتىكتىڭ رەسمي ساۋالىنا وراي.

بۇعان دەيىن الماتى جانە تۇركىستان وبلىستارىندا ءەتنوتۋريزمنىڭ باسقا وڭىرلەرگە قاراعاندا جوعارى دەڭگەيدە دامىپ كەلە جاتقانىن جازعان ەدىك.

بۇل وڭىرلەردە ۇلتتىق داستۇرلەر مەن مادەنيەتكە نەگىزدەلگەن تۋرلار ۇيىمداستىرىلادى. سونىمەن قاتار، قازاق حالقىنىڭ تۇرمىس-تىرشىلىگى مەن قولونەرىن كورسەتۋ ماقساتىندا ەتنواۋىلدار قۇرىلىپ جاتىر.