مىسىرلىقتار قازاقتىڭ ۇلى اقىنى، كەمەڭگەر ويشىلى ابايدىڭ مۇرالارىن ناسيحاتتادى

كاير. قازاقپارات – 12-تامىز -مىسىر پرەمەر-ءمينيسترىنىڭ قولداۋىمەن 11-كاير حالىقارالىق ءداستۇرلى ونەر جانە پوەزيا فەستيۆالى ءوتتى.

مىسىر مادەنيەت مينيسترلىگى جانىنان قۇرىلعان ارنايى كوميسسيانىڭ شەشىمىمەن اباي قۇنانباي ۇلىنىڭ مۇراسى «ادامزات وركەنيەتىنە قوسقان ۇلەسى» ءۇشىن ارنايى ماراپاتقا يە بولدى.

ارنايى ەسكەرتكىش سىيلىق پەن ونىڭ كۋالىگى قازاقستان رەسپۋبليكاسىنىڭ مىسىر اراب رەسپۋبليكاسىنداعى ەلشىلىگىنە سالتاناتتى تۇردە تابىس ەتىلدى.

حالىقارالىق فەستيۆالدىڭ نەگىزىن قالاۋشى ينتيسار ابدەل فاتتاحتىڭ حابارلاۋىنشا، اتالعان فەستيۆالگە جاپونيا، كولۋمبيا، قىتاي، ءۇندىستان، پالەستينا، وڭتۇستىك سۋدان، ماۆريتانيا وكىلدەرى جانە مىسىردىڭ ءارتۇرلى ايماقتارىنان كەلگەن 30 دان استام شىعارماشىلىق توپتار قاتىستى.

بارشامىزعا ءمالىم، پيراميدالار ەلىندە 1998-جىلى كاير قالاسىنىڭ ماادي اۋدانىنداعى كوشەگە اباي ەسىمى بەرىلدى. سونىمەن قاتار 2016 -جىلدىڭ قازان ايىندا ءنىل وزەنىنىڭ جاعالاۋىندا ورنالاسقان الەمگە تانىمال تۇلعالارعا ارنالعان حالىقارالىق ساياباقتا قازاقتىڭ ۇلى اقىنى ابايدىڭ ەسكەرتكىش بيۋستى ورناتىلدى.

11- كاير حالىقارالىق ءداستۇرلى ونەر فەستيۆالىنە قاتىسقان اقىن-جازۋشىلارعا قازاقستاننىڭ مىسىرداعى ەلشىلىگى اراب تىلىنە اۋدارعان ابايدىڭ قارا سوزدەرى مەن باسقا شىعارمالارى ەنگەن كىتاپتاردى سىيعا تاراتتى.

سونداي-اق ەلشىلىك اباي قۇنانباي ۇلىنىڭ تۋىندىلارىن دارىپتەيتىن ارنايى ەسكەرتكىش سىيلىق پەن ونىڭ كۋالىگىن ابايدىڭ «جيدەباي-ءبورىلى» مەملەكەتتىك تاريحي- مادەني جانە ادەبي-مەموريالدىق مۋزەي-قورىعىنا تابىستايدى.