مىسىردا پەرعاۋىن مۇراگەرىنىڭ قابىرى تابىلدى
كاير. KAZINFORM - كايردىڭ وڭتۇستىگىندە ارحەولوگتار V اۋلەتتىڭ العاشقى بيلەۋشىسى بولعان پەرعاۋىن ۋسەركافتىڭ ۇلى - حانزادا ۋسەرەفرانىڭ قابىرى مەن III اۋلەتتىڭ نەگىزىن قالاۋشى پەرعاۋىن دجوسەردىڭ، ونىڭ جۇبايى مەن ون قىزىنىڭ مۇسىندەرىن تاپتى. بۇل جونىندە مىسىردىڭ تۋريزم جانە ەجەلگى مۇرا مينيسترلىگى حابارلادى، دەپ 24.kg جازدى.
مينيسترلىكتىڭ مالىمەتىنشە، زاحي حاۆاسس اتىنداعى ەجەلگى مۇرا مەن مۇراعات قورى سونداي-اق جوعارعى ەجەلگى ەسكەرتكىشتەر كەڭەسىنىڭ باسشىلىعىمەن جۇمىس ىستەگەن بىرلەسكەن مىسىرلىق ارحەولوگيالىق ەكسپەديتسيا ساككارا ايماعىندا جۇرگىزىلگەن قازبا جۇمىستارى كەزىندە ۋسەرەفرا حانزادانىڭ قابىرىن تاپقان. سونداي-اق بۇل جەردە سول داۋىرگە جانە ودان كەيىنگى كەزەڭدەرگە جاتاتىن ماڭىزدى ارحەولوگيالىق ولجالار تابىلعان.
ارحەولوگيالىق نىساندا كوپتەگەن يەروگليف جازبالار بار. ولاردىڭ ءبىرقاتارى مارقۇم حانزادانىڭ ەسىمى مەن اتاقتارىن سيپاتتايدى. مىسالى، وندا «مۇراگەر حانزادا، بۋتو مەن نەحبەت ايماقتارىنىڭ بيلەۋشىسى، پاتشا حاتشىسى، مينيستر، سۋديا جانە ءدىني قىزمەتكەر» دەگەن اتاقتار كەزدەسەدى.
قازبا بارىسىندا عالىمدار بيىكتىگى 5 مەترگە جۋىق جانە ەنى 1 مەتردەن اساتىن قىزعىلت گرانيتتەن جاسالعان جالعان ەسىك تاپقان. جوعارعى كەڭەستىڭ مالىمدەۋىنشە، مۇنداي ءىرى جالعان ەسىك بۇرىن-سوڭدى ەش جەردە تابىلعان ەمەس.
ەسكە سالا كەتەيىك، قازاقستاندا ارحەولوگيالىق ولجانى جىمقىرعاندارعا جازا كۇشەيتىنى تۋرالى جازعان بولاتىنبىز.