مىسىردا II تۋتموستىڭ قابىرى انىقتالدى
استانا. KAZINFORM - بۇل 1922 -جىلى تۋتانحاموننىڭ قابىرى انىقتالعالى تابىلعان العاشقى مىسىرلىق پاتشا قابىرى، دەپ حابارلايدى CBS News.
مىسىر بيلىگى سەيسەنبى كۇنى ب. ز. د. شامامەن 1550-1292 -جىلدارى بيلىك ەتكەن ەجەلگى مىسىردىڭ XVIII اۋلەتى بيلەۋشىلەرىنىڭ جوعالعان بەيىتتەرىنىڭ سوڭعىسى - پەرعاۋىن II تۋتموستىڭ قابىرى انىقتالعانىن جاريالادى.
II تۋتموستىڭ قابىرىن مىسىرلىق-بريتاندىق بىرلەسكەن ارحەولوگيالىق ميسسيا انىقتاعان.
زەرتتەۋشىلەر توبى مەن مىسىردىڭ تۋريزم جانە كونە جادىگەرلەر مينيسترلىگىنىڭ مالىمەتىنشە، بۇرىن تەك № C4 دەگەن اتپەن بەلگىلى بولعان قابىر قازبالارى ونىڭ II تۋتموسقا تيەسىلى ەكەنىن كوز جەتكىزەتىن دالەلدەر تاپتى.
عيماراتقا كىرەبەرىس پەن نەگىزگى جول 2022 -جىلى انىقتالعان، سودان كەيىن ىشكى قازبالار جۇرگىزىلگەن.
مىسىردىڭ كونەلىكتەر جونىندەگى جوعارعى كەڭەسىنىڭ باس حاتشىسى مۇحاممەد يسمايل حالەدتىڭ بايانداۋىنشا، ميسسيا ءۇش جىل بۇرىن كىرەبەرىستى العاشىندا تاپقان كەزدە، زەرتتەۋشىلەر ونى پاتشا ايەلدەرىنىڭ بىرىنە تيەسىلى بولۋى مۇمكىن دەپ بولجاعان.
قازبالار مەن ارتەفاكتىلەردى زەرتتەۋ جۇمىستارىن جالعاستىرۋ كەزىندە ميسسيا جۇمباق قابىردىڭ 2 تۋتموسقا تيەسىلى ەكەنىن كورسەتەتىن جاڭا دالەلدەر تاپتى. سونداي-اق ونىڭ جەرلەۋ ءراسىمىن ايەلى مەن اپكەسى حاتشەپسۋت وتكىزگەن دەپ شامالانىپ وتىر.
حالەدتىڭ ايتۋىنشا، قيراندىلاردان تابىلعان الەباستر ىدىستارىنىڭ بولىكتەرىندە كورول II تۋتموستىڭ، سونداي-اق حاتشەپسۋتتىڭ ەسىمى جازىلعان جازۋلار بار.
حالەد بۇل جاڭالىقتى سوڭعى جىلدارداعى ەڭ ماڭىزدى ارحەولوگيالىق وقيعالاردىڭ ءبىرى دەپ اتادى. تابىلعان جادىگەرلەر بۇل ايماقتىڭ تاريحى مەن 2 تۋتموس پاتشالىعى تۋرالى بىلىمگە قۇندى قوسىمشا بولدى.
اۆتور
زارينا تۋعانبايەۆا