مىسىردا 3600 جىل بۇرىن بيلىك قۇرعان پاتشانىڭ قابىرى تابىلدى
استانا. KAZINFORM - فيلادەلفياداعى پەنسيلۆانيا ۋنيۆەرسيتەتىنىڭ ەگيپەت-امەريكا ارحەولوگيالىق ميسسياسى ەگيپەتتىڭ وڭتۇستىگىندەگى ابيدوس ايماعىندا 3600 جىل بۇرىن بيلىك قۇرعان بەلگىسىز پاتشانىڭ قابىرىن تاپتى. بۇل تۋرالى Artnet حابارلادى.
قابىردىڭ تەرەڭدىگى جەتى مەتردەي جانە ساز كىرپىشتەن سالىنعان كۇمبەزدى اكتاس جەرلەۋ بولمەسى بار. كىرەبەرىستىڭ ەكى جاعىندا ەگيپەتتىك يسيدا نەفتيدا قۇدايلارىنىڭ ەسىمدەرى ساقتالعان. ولار ءجيى بىرگە بەينەلەنگەن، ويتكەنى يسيدا تۋۋدى، ال نەفتيدا ءولىمدى بەينەلەگەن.
زەرتتەۋشىلەردىڭ ايتۋىنشا، ابيدوس اۋلەتى ءبىزدىڭ داۋىرىمىزگە دەيىنگى 1630-1539-جىلدار ارالىعىندا ءومىر سۇرگەن. ول كەزدە ەگيپەتتىڭ سولتۇستىك بولىگىن گيكسولار، وڭتۇستىك بولىگىن بىرنەشە جەرگىلىكتى پاتشالار بيلەدى.
قابىردەن تابىلعان پاتشانىڭ اتى- ءجونى بەلگىسىز. ارحەولوگتار ونىڭ ەسىمى كىرەبەرىستەگى كىرپىشتەرگە جازىلعان دەپ ەسەپتەيدى، ءبىراق يەروگليفتەر وقىلمايدى، ويتكەنى ولاردى قابىر توناۋشىلار بۇلدىرگەن.
مىسىردىڭ ەجەلگى ەسكەرتكىشتەر جوعارعى كەڭەسىنىڭ باس حاتشىسى موحامەد يسمايل حالەدتىڭ ايتۋىنشا، بۇل جاڭالىق انۋبيس تاۋىنداعى كونە زيراتتارداعى پاتشا قابىرلەرىنىڭ دامۋى تۋرالى جاڭا عىلىمي دالەلدەر ۇسىنادى. سونداي-اق ابيدوس اۋلەتىنىڭ ەڭ از زەرتتەلگەن بيلەۋشىلەرى تۋرالى قوسىمشا مالىمەتتەر بەرەدى.
كەزىندە ارحەولوگتار بۇل اۋلەتتىڭ بار ەكەنىنە دە كۇمان كەلتىرگەن. الايدا ابيدوس بيلەۋشىلەرىنىڭ ءبىرى سەنەبكايدىڭ بەيىتى تابىلعاننان كەيىن جاعداي وزگەردى.
ارحەولوگتار ايماقتى زەرتتەۋدى جالعاستىرىپ جاتىر. ولار بۇل جەردەن سول داۋىرگە جاتاتىن باسقا پاتشالاردىڭ بەيىتتەرىن تاۋىپ، سول ارقىلى جاڭادان تابىلعان بەيىت يەسىنىڭ كىم ەكەنىن انىقتاۋعا بولادى دەپ بولجايدى.
ەسكە سالا كەتەيىك، مىسىردا II تۋتموستىڭ قابىرى انىقتالدى.