مىسىر پرەزيدەنتى 12 جىلدا العاش رەت تۇركياعا كەلدى
استانا. KAZINFORM - مىسىر پرەزيدەنتى ابدەل فاتتاح ءال- سيسي تۇركيا پرەزيدەنتى رەجەپ تايىپ ەردوعانمەن كەلىسسوزدەرگە قاتىسۋ ءۇشىن بۇگىن رەسمي ساپارمەن انكاراعا كەلدى.
بۇل ايماقتىق دەرجاۆالار اراسىنداعى قارىم-قاتىناس جاقسارعالى بەرگى ەكى ەل اراسىنداعى سوڭعى 12 جىلداعى العاشقى پرەزيدەنتتىك ساپار.
كەزدەسۋ رەجەپ تايىپ ەردوعاننىڭ اقپان ايىندا كايرگە ساپارىنان كەيىن، 2012 -جىلدان بەرى ءبىرىنشى رەت، ونجىلدىقتا قاتتى شيەلەنىسكەن قارىم- قاتىناستى قالپىنا كەلتىرۋ جولىنداعى ماڭىزدى قادام بولدى.
مىسىر پرەزيدەنتىنىڭ 2014 -جىلى قىزمەتكە كىرىسكەننەن بەرگى انكاراعا العاشقى ساپارى تۇرىك ارىپتەسى ر. ەردوعاننىڭ شاقىرۋىمەن جۇزەگە اسىرىلادى.
- تۇركيا مەن ەگيپەت اراسىنداعى قارىم-قاتىناس بارلىق اسپەكتىلەردە قاراستىرىلادى، سونداي-اق ىنتىماقتاستىقتى ودان ءارى دامىتۋ بويىنشا الداعى كەزەڭدەگى ىقتيمال بىرلەسكەن قادامدار تالقىلانادى،- دەپ حابارلادى تۇركيا پرەزيدەنتىنىڭ باسپا ءسوز قىزمەتى.
ءبىر كۇندىك ساپار اياسىندا ەكى ەلدىڭ جوعارى دەڭگەيلى ستراتەگيالىق ىنتىماقتاستىق كەڭەسىنىڭ ءبىرىنشى وتىرىسى وتەدى. وندا تۇرىك-مىسىر قارىم- قاتىناستارى جان- جاقتى قاراستىرىلىپ، ەكىجاقتى ساۋدا اينالىمىن جىلىنا 10 ميلليارد دوللاردان 15 ميلليارد دوللارعا دەيىن ارتتىرۋ ءۇشىن جاسالۋى مۇمكىن ورتاق قادامدار تالقىلانادى.
مىسىر مەن تۇركيا باسشىلارىنىڭ كەلىسسوزدەرىندە پالەستينا-يزرايل قاقتىعىستارىن رەتتەۋ جانە باسقا دا ايماقتىق جانە جاھاندىق پروبلەمالاردى تالقىلاۋ جوسپارلانعان.
«ەكى جاقتى قارىم-قاتىناستاردان باسقا، وزەكتى ايماقتىق جانە جاھاندىق ماسەلەلەر، اسىرەسە يزرايلدىڭ گازا سەكتورى مەن باسىپ الىنعان پالەستينا اۋماقتارىنا جاساعان شابۋىلدارىنا قاتىستى پىكىر الماسۋ بولادى»، - دەپ قوستى تۇركيا پرەزيدەنتىنىڭ باسپا ءسوز قىزمەتى.
ساپار بارىسىندا ەكى ەل ەنەرگەتيكا، قورعانىس، تۋريزم جانە ءبىلىم بەرۋ سياقتى سالالاردى قامتيتىن 20 عا جۋىق كەلىسىمگە قول قويادى. سونداي- اق كۇن تارتىبىندە جاڭارتىلاتىن ەنەرگيا جانە سۇيىتىلعان تابيعي گاز (ستگ) سالاسىنداعى ىنتىماقتاستىق ماسەلەلەرى قاراستىرىلادى.
تۇركياعا مەملەكەت باسشىلارى دەڭگەيىندەگى سوڭعى ساپار 2012 -جىلى جاسالدى، ول جولى مىسىردىڭ بۇرىنعى پرەزيدەنتى مۇحاممەد مۋرسي تۇركياعا كەلگەن.
انكارا مەن كاير اراسىنداعى قارىم- قاتىناس 2013 -جىلى ەگيپەتتىڭ قازىرگى پرەزيدەنتى، سول كەزدەگى ارميا باسشىسى ابدەل فاتتاح ءال- سيسي تۇركيانىڭ وداقتاسى رەتىندە قاراستىرىلعان «مۇسىلمان باۋىرلار» قوزعالىسىنىڭ جەتەكشىسى مۇحاممەد ءمۋرسيدى تاقتان تايدىرعاننان كەيىن كۇرت ناشارلادى.
2013 -جىلى ەكى ەل دە ەلشىلەرىن كەرى شاقىردى. 2021 -جىلدىڭ ناۋرىز ايىندا تۇركيا سىرتقى ىستەر مينيسترلىگى مىسىر ەلىمەن ديپلوماتيالىق دەڭگەيدە بايلانىستاردى قالپىنا كەلتىرەتىنىن حابارلادى. 2023 -جىلدىڭ شىلدەسىندە ەكى ەل دە انكارا مەن كايردە ەلشىلەردى تاعايىنداۋ ارقىلى ديپلوماتيالىق قارىم-قاتىناستاردى تولىعىمەن قالپىنا كەلتىردى.