مينيسترلىكتەر جاڭا جۇمىس كەستەسىنە كوشە باستادى

استانا. KAZINFORM - ەكولوگيا جانە تابيعي رەسۋرستار مينيسترلىگىنىڭ جۇمىس ۋاقىتى وزگەردى، دەپ حابارلايدى ۆەدومستۆونىڭ باسپا ءسوز قىزمەتى.

مينيسترلىك 2025-جىلعى 18-ساۋىردەن باستاپ جۇمىس ۋاقىتى ساعات 08:00 دەن 17:30 عا دەيىن وزگەرەتىندىگىن حابارلادى.

- ق ر ەڭبەك كودەكسىنىڭ 46-بابىنا سايكەس ەكولوگيا جانە تابيعي رەسۋرستار مينيسترلىگىندە، ونىڭ ۆەدومستۆولارى مەن ولاردىڭ اۋماقتىق قۇرىلىمدارىندا جۇمىس ۋاقىتىنىڭ رەجيمى وزگەرگەنى تۋرالى حابارلايمىز. ساعات 13.00-14.30 اراسىندا دەمالىسقا جانە تاماقتانۋعا ءۇزىلىس بەرىلەدى، جۇمىس كۇنى ساعات 08.00 دە باستالىپ، ساعات 17.30 دا اياقتالادى. وسىعان بايلانىستى، بارلىق قىزمەت كورسەتۋشىلەردى جاڭارتىلعان جۇمىس كەستەسىنە كوشۋگە جانە قابىلداۋدى جاڭا گرافيككە سايكەس قاتاڭ تۇردە جۇرگىزۋگە شاقىرامىز، - دەلىنگەن ۆەدومستۆو تاراتقان اقپاراتتا.

ەسكە سالساق، بۇعان دەيىن كاتونقاراعاي اۋدانىندا جۇمىس ۋاقىتى ءبىر ساعاتقا كەرى شەگەرىلگەنى حابارلانعان.

كەيىن تاعى بىرنەشە اۋداندا جۇمىس ۋاقىتى وزگەرتىلدى.

12-ناۋرىز كۇنى التاي جانە ۇلان اۋداندارىندا دا جۇمىس ۋاقىتى ساعات 08.00 دە باستالاتىندىعى تۋرالى جازعانبىز.

سونىمەن قوسا، شىعىس قازاقستان وبلىسىنداعى گلۋبوكوە جانە شەمونايحا اۋداندارىندا جۇمىس ۋاقىتى ءبىر ساعاتقا شەگەرىلدى.

ايتا كەتەيىك، عالىمدار ۋاقىت بەلدەۋىن وزگەرتۋدىڭ كەرى اسەرىن دالەلدەسە، كىم جاۋاپتى بولاتىنىن جازعانبىز.