مينيسترلىك تىكۇشاق اپاتىنان قازا تاپقان وفيتسەردىڭ اتى-ءجونىن اتادى

استانا. KAZINFORM - قورعانىس مينيسترلىگى رەسمي مالىمدەمە جاساپ، اقتوبەدەگى تىكۇشاق اپاتىنان قازا تاپقان جانە زارداپ شەككەندەردىڭ اتى-جوندەرىن اتادى.

- اقتوبە وبلىسىنداعى وقۋ-جاتتىعۋ ۇشۋى كەزىندە بولعان اۆياتسيالىق اپات سالدارىنان 1988 -جىلى تۋعان اۋە قورعانىسى كۇشتەرى اسكەري ينستيتۋتى اۆياتسيالىق ەسكادريلياسىنىڭ وفيتسەر- نۇسقاۋشىسى مايور باتىر قايرات ۇلى ورازىمبەتوۆ قايعىلى جاعدايدا قازا تاپتى، - دەلىنگەن حابارلامادا.

وفيتسەر اۋە قورعانىسى كۇشتەرى اسكەري ينستيتۋتىن 2009 -جىلى «ۇشاقتار، تىكۇشاقتار جانە اۆياتسيالىق قوزعالتقىشتار» ماماندىعى بويىنشا بىتىرگەن. قىزمەت بارىسىندا اۋە قورعانىسى كۇشتەرىندە ءتۇرلى لاۋازىمداردان وتكەن. مي-8 تىكۇشاعىن پايدالانۋدا ۇلكەن تاجىريبەسى بار، جالپى ۇشۋ ۋاقىتى 500 ساعاتتان اسادى. قىزمەت بارىسىندا جوعارى كاسىبيلىك پەن ادالدىق تانىتقان. بيىلعى جىلدىڭ كوكتەمىندە بولعان سۋ تاسقىنىنا قارسى ءىس- شارالارعا قاتىسقان. مەرەيتويلىق جانە ەڭبەك سىڭىرگەن جىلدارى ءۇشىن مەدالدارىمەن ماراپاتتالعان. ۇيلەنگەن، ارتىندا ەكى بالاسى قالدى.

- اپاتتى جاعدايداعى قونۋ كەزىندە زارداپ شەككەن اسكەري ينستيتۋت اۆياتسيالىق ەسكادريلياسىنىڭ كومانديرى مايور بيبارىس يبرايەۆ پەن وقۋ-جاتتىعۋ اۆياتسيالىق ورتالىعىنىڭ اعا ۇشقىش- نۇسقاۋشىسى اعا لەيتەنانت رۇستەم نىعمەتوۆ قازىر وبلىستىق اۋرۋحانادا جاتىر. جاعدايلارى تۇراقتى اۋىر. ولارعا بارلىق قاجەتتى مەديتسينالىق كومەك كورسەتىلۋدە، - دەپ قوستى ۆەدومستۆو باسپا ءسوز قىزمەتى.

قازا تاپقان وفيتسەر مەن زارداپ شەككەندەردىڭ تۋىستارى مەن جاقىندارىنا جان-جاقتى قولداۋ كورسەتىلۋ ۇستىندە.

ەسكە سالساق، مارتوك اۋدانى سارىجار اۋىلىندا تىكۇشاق اپاتقا ۇشىرىپ، جانىپ كەتتى.

بورتتا ءۇش ادام بولعان. ونىڭ بىرەۋى وقيعا ورنىندا كوز جۇمدى.

سونىمەن قاتار، تىكۇشاق اپاتىنا بايلانىستى قىلمىستىق ءىس قوزعالدى. قازىر تەرگەۋ ءجۇرىپ جاتىر.

بۇدان بولەك، اقتوبە وبلىسىنىڭ اكىمدىگى تىكۇشاق اپاتىنان زارداپ شەككەندەرگە كومەك كورسەتەتىنىن ءمالىم ەتتى.

اۆتور
اينۇر تۋماكبايەۆا