مينيسترلىك كاسپييدەگى شايانداردىڭ قىرىلۋىنا قاتىستى تۇسىنىكتەمە بەردى
استانا. KAZINFORM - كاسپي تەڭىزىندە شايانداردىڭ جاپپاي قىرىلۋى تىركەلگەن بولاتىن. وسى ماسەلەگە قاتىستى بۇگىن ق ر اۋىل شارۋاشىلىعى مينيسترلىگى تۇسىنىكتەمە بەردى.
«بالىق رەسۋرستارى مەن باسقا دا سۋ جانۋارلارىنىڭ قاۋىپ-قاتەرى جانە (نەمەسە) قىرىلۋى انىقتالعان كەزدە ءوزارا ءىس-قيمىل سحەماسىنا سايكەس جايىق-كاسپي وبلىس ارالىق باسسەيندىك بالىق شارۋاشىلىعى ينسپەكسياسىمەن مۇددەلى مەملەكەتتىك ورگاندارعا حابارلانعانىن مالىمدەيمىز»، - دەلىنگەن حابارلامادا.
وسىعان وراي شۇعىل تۇردە ماڭعىستاۋ وبلىسى بويىنشا بالىق ينسپەكسياسى باسقارماسىنىڭ مەملەكەتتىك ينسپەكتورلارى ماڭعىستاۋ وبلىسى بويىنشا ەكولوگيا دەپارتامەنتىنىڭ وكىلدەرىمەن بىرگە شايانداردىڭ بولجامدى قىرىلۋ ورنىنا باردى.
«اۋا-رايىنا بايلانىستى (داۋىل، لاي سۋ) شايانداردىڭ قىرىلعان جەرىن كوزبەن انىقتاۋ مۇمكىن بولمادى»، - دەپ حابارلادى ا ش م.
ەكولوگيا دەپارتامەنتى زەرتحانالىق زەرتتەۋلەر ءۇشىن سۋ سىنامالارى الىندى. ەكولوگ مامانداردىڭ ايتۋىنشا، مونيتورينگ جالعاسادى، اقپارات داۋىل اياقتالعاننان كەيىن قوسىمشا تەكسەرىلەتىن بولادى.
بۇعان دەيىن تەڭىز تۇبىندە جينالىپ جاتقان ءولى شايانداردىڭ تابىلعانى تۋرالى جازعان بولاتىنبىز.
اۆتور
باقىتگۇل اباي قىزى