مينيسترلىك استانادا نۇرسۇلتان نازاربايەۆتىڭ ەسكەرتكىشى نە ءۇشىن الىپ تاستالعانىن ءتۇسىندىردى
بۇگىن الەۋمەتتىك جەلىلەردە استاناداعى ۇلتتىق قورعانىس ۋنيۆەرسيتەتىنىڭ الدىندا تۇرعان ەكس-پرەزيدەنت نۇرسۇلتان نازاربايەۆتىڭ ەسكەرتكىشى الىپ تاستالعانى تۋرالى اقپارات تارادى. قورعانىس مينيسترلىگى وكىلدەرى وسى جاعدايعا قاتىستى پىكىر ءبىلدىردى، - دەپ حابارلايدى Massaget.kz ءتىلشىسى.
ۆەدومستۆو مالىمەتىنشە، ەسكەرتكىشتى باسقا عيماراتقا كوشىرۋ جوسپارلانعان.
«قورعانىس ءمينيسترىنىڭ بۇيرىعىمەن «ق ر تۇڭعىش پرەزيدەنتى - ەلباسى اتىنداعى ۇلتتىق قورعانىس ۋنيۆەرسيتەتىنىڭ» اتاۋى «ق ر ۇلتتىق قورعانىس ۋنيۆەرسيتەتى» بولىپ وزگەردى. سوندىقتان ۇلتتىق قورعانىس ۋنيۆەرسيتەتىنىڭ اۋماعىندا ورنالاسقان ق ر تۇڭعىش پرەزيدەنتىنىڭ ەسكەرتكىشىن ق ر قارۋلى كۇشتەرىنىڭ مەملەكەتتىك اسكەري-تاريحي مۇراجايىنىڭ عيماراتىنا كوشىرۋ جانە ورناتۋ تۋرالى شەشىم قابىلداندى. قازىر ەسكەرتكىش قورعانىس ۆەدومستۆوسىنىڭ ءبىر عيماراتىندا ۋاقىتشا ساقتالىپ تۇر. دايىندىق شارالارىن وتكىزگەننەن كەيىن ورناتۋ ءۇشىن ەسكەرتكىش مۇراجاي عيماراتىنا كوشىرىلەدى»، - دەپ جازىلعان ۆەدومستۆو حابارلاماسىندا.
ەسكە سالايىق، بۇعان دەيىن استاناداعى ۇلتتىق قورعانىس ۋنيۆەرسيتەتىنىڭ اۋماعىنان تۇڭعىش پرەزيدەنت نۇرسۇلتان نازاربايەۆتىڭ ەسكەرتكىشى الىپ تاستالعانى حابارلاندى. بۇل ەسكەرتكىش 2020-جىلى تۇڭعىش پرەزيدەنتتىڭ 80 جىلدىعىنا وراي سالتاناتتى تۇردە اشىلدى. ال ەسكەرتكىش الىپ تاستالعانى تۋرالى اقپارات الەۋمەتتىك جەلىلەردە پايدا بولدى.