مينيستر وسكەمەندىك جاستارعا قازىرگى زاماننىڭ ستۋدەنتى قانداي بولۋى كەرەكتىگىن ايتتى

ق ر عىلىم جانە جوعارى ءبىلىم ءمينيسترى ساياسات نۇربەك وسكەمەنگە جۇمىس ساپارىمەن بارىپ، س. امانجولوۆ اتىنداعى ش ق ۋ جاستارىمەن كەزدەستى، دەپ حابارلايدى Kazinform.

بۇگىندە بۇل ءبىلىم ورداسىندا 10000 نان استام ستۋدەنت وقىپ جاتىر. مينيسترمەن كەزدەسكەن بەلسەندى جاستار كوكەيدە جۇرگەن سۇراقتارىن قويىپ، جاۋاپ الدى. ستۋدەنتتەردى عىلىمدى قولداۋ ماقساتىندا اتقارىلىپ جاتقان جۇمىستار، جاتاقحانامەن قامتاماسىز ەتۋ، وقۋدى اياقتاعان سوڭ جۇمىسقا ورنالاسۋ سىندى ماسەلەلەر قىزىقتىردى.

«قازىرگى باسىم مىندەتتەردىڭ ءبىرى - اۋىل شارۋاشىلىعى، تاۋ-كەن سالاسى، مەتاللۋرگيا، ماشينا جاساۋ، ەنەرگەتيكا سياقتى بارلىق سالاعا اسەر ەتەتىن قازاقستان عىلىمىن جاس عالىمدار لەگىمەن تولىقتىرۋ. سول سەبەپتى عىلىمي وتاندىق بازانى جاڭا ازىرلەمەلەرمەن جانە جاس كادرلارمەن قامتۋ قاجەت. بۇل ماسەلەدە ۋنيۆەرسيتەت عىلىمى ماڭىزدى ءرول اتقارادى. ونىڭ دامۋىنا مەملەكەتتىك قولداۋ اسا اسەر ەتەدى. وسى جەردە «اكادەميالىق جانە باسقارۋشىلىق دەربەستىك تۋرالى» زاڭ قابىلدانعالى قازاقستاننىڭ جوعارى ءبىلىمىنىڭ جاڭعىرعانىن، كادرلار دايارلاۋعا دەگەن مەملەكەتتىك تاپسىرىس كولەمىنىڭ ۇلعايعانىن اتاپ وتكەن ءجون. بۇل شارا جاس تالانتتى ءبىلىم الۋشىلاردىڭ عىلىمي زەرتتەۋلەرگە جانە جوعارى رەيتينگىسى بار جۋرنالداردا ماقالا جاريالاۋعا دەگەن قۇلشىنىستارىن ارتتىردى»، - دەدى ساياسات نۇربەك.

ءوز سوزىندە ول بۇگىنگى زاماننىڭ ستۋدەنتى قانداي بولۋ كەرەكتىگىن اتاپ ءوتتى.

«وسى زاماندا تەك ءبىلىم الىپ قانا شەكتەلمەۋ كەرەك. جەتىستىككە جەتۋ ءۇشىن ادام ينتەللەكتىسىنىڭ تەك 2 پايىزى عانا كادەگە جارايدى ەكەن. ال قالعان ۇلەس تاباندىلىقتا. سول ءۇشىن ءبىز العان باعىتىنان قايتپايتىن، شىدامدى، ۇستانىمى بەرىك ادام بولۋىمىز قاجەت. ودان كەيىن سپورتتى جانعا سەرىك ەتكەن ءجون. سەبەبى ەرتەڭ سىرقات قىسسا العان بىلىمنەن ەش پايدا بولماي قالادى. تاعى ءبىر ايتا كەتەرلىگى، ستۋدەنتتەر دۇرىس اقپاراتتى عانا قابىلداۋى ءتيىس. سەبەبى اقپارات زامانىندا مۇلدە پايداسىز، ۋاقىتتى بوس ولتىرەر دۇنيەلەر كوپ»، - دەدى ق ر عىلىم جانە جوعارى ءبىلىم ءمينيسترى.

 

اۆتور

تالعاتجان مۇحامەتبەك ۇلى