مينيستر سپورت باسقارماسىنىڭ باسشىلارى نەگە اۋىسىپ جاتقانىن ءتۇسىندىردى

استانا. KAZINFORM – ق ر تۋريزم جانە سپورت ءمينيسترى ەربول مىرزابوسىنوۆ وڭىرلەردەگى سپورت باسقارمالارىنىڭ باسشىلارىن اۋىستىرۋ ماسەلەسىنە قاتىستى تۇسىنىك بەردى.

بۇل تۇرعىدا وبەكتيۆتى كوزقاراس بار، ياعني سوڭعى جىلدارى وليمپيادا ويىندارىنداعى ليتسەنزيالار سانىنان مەدال الۋعا دەيىن ناتيجە ايتارلىقتاي تومەندەدى.

«كەيىنگى كەزدە وڭىرلەردە باسشىلار اۋىستى. وڭىرلەردەگى باسقارما باسشىلارىنا قاتىستى مينيسترلىك جاعىنان ارنايى كوميسسيا قۇرىلدى. ونىڭ قۇرامىنا مينيسترلىك وكىلدەرى، دەپۋتاتتار، قوعامدىق ۇيىمداردىڭ وكىلدەرى ەندى. كوميسسيا اياسىندا ءوزىنىڭ باعدارلاماسىن ۇسىنعان كانديدات ىرىكتەلگەننەن كەيىن، ءبىز سول ادامدى وبلىس اكىمدىكتەرىنە ۇسىنامىز. ءوز كەزەگىندە جەرگىلىكتى اكىمدىك ونى تاعايىندايدى. اتاپ ايتقاندا، ءتيىستى تالاپتارعا ساي كەلەتىن، سپورت سالاسىن مەڭگەرگەن، سپورت مەنەدجمەنتىن بىلەتىن ادام وسى سالانى باسقارعانى ءجون»، - دەدى ە. مىرزابوسىنوۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، ەندى ەل وڭىرلەرى ءبىر- بىرىمەن باسەكەلەسپەيدى. ءار وڭىرگە ناقتى تاپسىرما بەرىلەدى. بۇل رەتتە ولارعا قانداي سپورت ءتۇرىن دامىتۋ كەرەك ەكەنى جانە رەسپۋبليكالىق دەڭگەيدە بەرەتىن ناتيجەسىنە قاتىستى ناقتى مىندەتتەر جۇكتەلەدى.

«بارلىعىمىز مەملەكەت يگىلىگى ءۇشىن جۇمىس ىستەپ جاتىرمىز. ال وڭىرلەردى دامىتۋ تۇرعىسىندا دۇرىس قادامدار جاسالسا، مۇددەلەر قاقتىعىسى بولمايدى. ويتكەنى ءبىز قازىردىڭ وزىندە ءاربىر ءوڭىردىڭ اياسىندا باسىمدىق بەرىلەتىن سپورتتى ايقىندايمىز. ولار وليمپيادا باعدارلاماسىنا ەنەتىن سپورت تۇرلەرى، پاراليمپيادا باعدارلاماسى، ۇلتتىق سپورت تۇرلەرى بولادى»، - دەدى مينيستر.

ايتا كەتەيىك، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق نورمالاردىڭ ارتىق زاڭنامالىق رەگلامەنتتەلۋىن بولدىرماۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

قۇجات اياسىندا سپورت فەدەراتسيالارىنىڭ قىزمەتى دە وزگەرەدى.

بۇدان بۇرىن حابارلانعانداي، وڭىرلىك سپورت باسقارمالارى باسشىلارى ق ر تۋريزم جانە سپورت مينيسترلىگى جانىنان قۇرىلعان كوميسسيانىڭ كەلىسىمىمەن تاعايىندالادى.

اۆتور

رۋسلان عابباسوۆ