مينيستر «قازاقستاندا كولىك سالىعى جويىلا ما» دەگەن سۇراقتىڭ نۇكتەسىن قويدى
ەلىمىزدە كولىك سالىعى جويىلمايتىن بولدى. بۇل تۋرالى ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى Kazinform.
«ەندىگى ۋاقىتتا كولىك سالىعىنا قاتىستى ماسەلە تالقىلانبايدى. ول قالا بەرەدى»، - دەدى مينيستر ءماجىلىس وتىرىسىنان كەيىن ب ا ق وكىلدەرىنىڭ ساۋالىنا وراي.
بۇعان دەيىن ۇلتتىق ەكونوميكا ۆيتسە-ءمينيسترى ازامات ءامرين كولىك سالىعىن جويۋ مۇمكىندىگىنە قاتىستى پىكىر بىلدىرگەن بولاتىن.
«بۇل ماسەلە جاڭا سالىق كودەكسى اياسىندا تالقىلانىپ جاتىر. ول ءسان-سالتانات سالىعىمەن بىرگە كەشەندى تۇردە قاراستىرىلادى. شىنىمەن دە كولىك سالىعىن بەنزينگە ارنالعان اكتسيزگە اۋىستىرۋ نۇسقاسى تالقىلانۋدا. ءبىراق، ونى تىڭعىلىقتى قاراستىرعان ءجون. ويتكەنى، ءبىز سارالايمىز. كولىك سالىعى قوزعالتقىش كولەمى 4 نەمەسە 3,5 ليترگە دەيىنگى اۆتوموبيلدەر ءۇشىن جويۋ كوزدەلەتىن شىعار. قازىر قوسىمشا ەسەپتەۋلەر جۇرگىزىپ جاتىرمىز»، - دەگەن ەدى ازامات ءامرين ۇكىمەت وتىرىسىنان كەيىن ۇيىمداستىرىلعان بريفينگتە.