مينيستر: ۇشاقتاعى ورىن سانىنان كوپ بيلەت ساتۋ - الەمدىك تاجىريبە
استانا. KAZINFORM - كولىك ءمينيسترى مارات قارابايەۆ ۇشاقتاعى ورىن سانىنان ارتىق بيلەت ساتۋ تاجىريبەسى تۋرالى ءوز پىكىرىن ءبىلدىردى.
«اۋە كومپانيالارى ۇشاقتاعى ورىن سانىنان كوپ بيلەت ساتادى، سالدارىنان كەي جولاۋشىلار ۇشا الماي قالادى. بۇل جۇمىستى قانداي دا ءبىر جولمەن رەتتەۋ مۇمكىن بە؟ » - دەپ سۇراق قويدى تىلشىلەر ۇكىمەتتە.
ءوز جاۋابىندا مينيستر مۇنىڭ حالىقارالىق جانە الەمدىك تاجىريبە ەكەنىن، ەشبىر ەلدە شەكتەۋ قويىلماعانىن ايتتى.
«مۇندا بىرنەشە بيلەت ارتىعىمەن ساتىلادى جانە ءىس جۇزىندە كەي جولاۋشىلار بورتقا تىركەلمەيدى. سوندىقتان، الەمنىڭ بارلىق كومپانيالارى، ونىڭ ىشىندە قازاقستاندىق كومپانيالار دا وسىنداي تاجىريبەنى قولدانادى. تۇتاستاي العاندا، مەن مۇنىڭ ورىندى ەكەنىن قاراستىرۋعا بولادى دەپ ويلايمىن، الايدا جان-جاقتى زەرتتەۋ كەرەك بولادى. مۇندا سالا بلوگەرلەرى جانە ءبىزدىڭ ازاماتتار جەكەلەگەن بۇزۋشىلىقتار ءۇشىن ايىپپۇلدى كوتەرۋ باستاماسىن ۇسىنۋدا. ءيا، اۋە كومپانياسىنا ايىپپۇلدى كوتەرۋگە بولادى، ءبىراق كومپانيا بۇل ايىپپۇلدى تولەۋ ءۇشىن بيلەت باعاسىن قىمباتتاتۋى مۇمكىن»، - دەدى كولىك ءمينيسترى م. قارابايەۆ.
سوندىقتان مينيستر بۇل تاقىرىپتى دەپۋتاتتارمەن ءارى قاراي تالقىلايتىنىن ايتۋدا.
«ءبىز بۇزۋشىلىقتىڭ جەكەلەگەن تۇرلەرى ءۇشىن تەك اۋە كومپانياسىنا ەمەس، ونىڭ ءبىرىنشى باسشىسىنا دا اكىمشىلىك ايىپپۇل سالۋدى تالقىلايمىز»، - دەدى مارات قارابايەۆ.
اۆتور
ايجان سەرىكجان قىزى