مينيستر: بۇل - ءبىر دارىگەرگە ەمەس، بۇكىل دەنساۋلىق ساقتاۋ جۇيەسىنە سوققى

استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا قوستاناي جانە قاراعاندى قالالارىندا دارىگەرلەرگە قاتىستى سۇمدىق وقيعالاردان كەيىن قازاقستاندىقتارعا ۇندەۋ جولدادى.

مينيستر مەديتسينا قىزمەتكەرلەرىنە قارسى زورلىق-زومبىلىقتى توقتاتۋدى تالاپ ەتتى. ونىڭ سوزىنشە، قوستاناي وبلىستىق اۋرۋحاناسىندا قاتىگەزدىكپەن سوققىعا جىعىلعان جاس حيرۋرگتىڭ جاعدايى اۋىر.

- سىزدەرگە پەرزەنتحانادا مەيىرگەر، بالالار اۋرۋحاناسىنىڭ قابىلداۋ بولىمىندە كەزەكشى جانە ورديناتور دارىگەر بولىپ جۇمىس ىستەگەن مامان رەتىندە ءۇن قاتقىم كەلەدى: مەديتسينا قىزمەتكەرلەرىنە قارسى زورلىق-زومبىلىقتى توقتاتىڭىزدار! نەگىزسىز، اشۋ مەن ىزاعا بوي الدىرعان قاتىگەز ارەكەتتەر كەزىندە ءوز بالالارىڭىزدى، اتا-انالارىڭىزدى، جاقىندارىڭىزدى امان الىپ قالۋعا جان سالىپ جۇرگەن دارىگەر مەن مەيىرگەردىڭ بويىن بيلەگەن جان جاراسى مەن قورلىعى، قورعانسىزدىعى مەن ۇرەيىن ەلەستەتۋ مۇمكىن ەمەس. ءبىز تاعى دا قاراعاندى مەن قوستانايدا بولعان ەكى سوراقى جاعدايعا كۋا بولىپ وتىرمىز. قاراعاندىدا جەكە كلينيكانىڭ مەيىرگەرىنە شابۋىل جاسالدى. قوستاناي وبلىستىق اۋرۋحاناسىندا ۋرولوگيا ءبولىمىنىڭ جاس حيرۋرگى قاتىگەزدىكپەن سوققىعا جىعىلدى. پاتسيەنت ءوز كەزەگىن كۇتكىسى كەلمەگەندىكتەن، دارىگەردى ءبىر ۇرىپ، ەسىنەن تاندىرعان. قازىر دارىگەر رەانيماتسيادا. جاعدايى - اۋىر، - دەدى ءالنازاروۆا.

دەنساۋلىق ساقتاۋ ءمينيسترى بەيبىت زاماندا دارىگەرلەردىڭ ءوز جۇمىس ورنىندا ومىرىنە قاۋىپ ءتونىپ وتىرۋى - اقىلعا قونبايتىن، مۇلدە جول بەرۋگە بولمايتىن جاعداي ەكەنىن ايتتى.

- ادام ءومىرىن اراشالاپ جۇرگەن جانعا قول كوتەرۋ ءۇشىن ادام قانشالىقتى دەڭگەيدە قاتىگەز جانە مەيىرىمسىز بولۋى كەرەك؟ بەيبىت ۋاقىتتا دارىگەرلەردىڭ ءوز جۇمىس ورنىندا ومىرىنە قاۋىپ ءتونىپ وتىرۋى - اقىلعا قونبايتىن، مۇلدە جول بەرۋگە بولمايتىن جاعداي. بۇل - تەك ءبىر دارىگەرگە جاسالعان شابۋىل ەمەس. بۇل - ونداعان پاتسيەنتتىڭ قاراۋسىز قالۋى، ونداعان وپەراتسيانىڭ كەيىنگە شەگەرىلۋى. بۇل - بۇكىل دەنساۋلىق ساقتاۋ جۇيەسىنە تونگەن تىكەلەي سوققى. شابۋىل جاسالعان قابىلداۋ بولىمدەرى - ونسىز دا قاۋپى جوعارى ايماقتار، - دەپ اتاپ ءوتتى مينيستر.

د س م باسشىسى مەديتسينا قىزمەتكەرلەرىنە جاسالعان شابۋىل ءۇشىن جاۋاپكەرشىلىكتى كۇشەيتۋگە باعىتتالعان زاڭنامالىق وزگەرىستەر بيىلعى قىركۇيەكتە پارلامەنتكە ەنگىزىلەتىنىن العا تارتتى.

- مۇنداي ارەكەتتەردى تۇرمىستىق قاقتىعىس رەتىندە ەمەس، قوعامدىق قاۋىپسىزدىككە تونگەن قاۋىپ رەتىندە باعالاۋ قاجەت. مەديتسينا قىزمەتكەرلەرىنە قارسى زورلىق-زومبىلىقتىڭ جيىلەپ كەتۋىنە بايلانىستى ىشكى ىستەر مينيسترىمەن بىرلەسىپ، شۇعىل تۇردە ۋرگەنتتىك ستاتسيونارلاردىڭ، بالالار جانە پەريناتالدىق ورتالىقتاردىڭ قابىلداۋ بولىمدەرىندە تاۋلىك بويى كۇزەت پوستتارىن كۇشەيتۋ تۋرالى شەشىم قابىلداندى. بارلىق مەديتسينالىق ۇيىم بەينەباقىلاۋ جۇيەسىمەن، كۇزەتپەن جانە دابىل باتىرمالارىمەن قامتاماسىز ەتىلۋى ءتيىس، - دەپ ءتۇسىندىردى ءالنازاروۆا.

ۆەدومستۆو جەتەكشىسى اتاپ وتكەندەي، جاپا شەككەن قوستانايلىق دارىگەردىڭ ءومىرىن ساقتاۋ ءۇشىن دەنساۋلىق ساقتاۋ مينيسترلىگى بارلىق قاجەتتى ءارى باتىل شارالاردى قابىلدايتىن بولادى.

- ەرتەڭ دارىگەر سانيتاريالىق اۆياتسيامەن ۇلتتىق شۇعىل مەديتسينانى ۇيلەستىرۋ ورتالىعىنا جەتكىزىلىپ، بىلىكتى مامانداردىڭ قاتىسۋىمەن ءارى قاراي ەم قابىلدايدى، - دەدى مينيستر.

بۇعان دەيىن حابارلانعانداي، قوستاناي وبلىستىق اۋرۋحاناسىنىڭ جەدەل جاردەم قابىلداۋ بولىمىندە ناۋقاس حيرۋرگتى سوققىعا جىقتى. كەيىننەن زارداپ شەككەن دارىگەردىڭ اتى- ءجونى بەلگىلى بولدى. قازىر حيرۋرگ جانساقتاۋ بولىمىندە جاتىر.