مىندەتتى مەديتسينالىق ساقتاندىرۋ جۇيەسىندە قامتىلماعان ازاماتتاردىڭ مارتەبەسىن انىقتاۋ ءجۇرىپ جاتىر
استانا. KAZINFORM - مىندەتتى مەديتسينالىق ساقتاندىرۋ جۇيەسىندە قامتىلماعان ازاماتتاردىڭ مارتەبەسىن انىقتاۋ ءجۇرىپ جاتىر. بۇل تۋرالى ءماجىلىستىڭ جالپى وتىرىسىندا پرەمەر- ءمينيستردىڭ ورىنباسارى تامارا دۇيسەنوۆا ءمالىم ەتتى.
«سايلاۋشىلار كوپ كوتەرىپ جۇرگەن ماسەلەلەردىڭ ءبىرى - مىندەتتى مەديتسينالىق ساقتاندىرۋ جۇيەسى. مەديتسينالىق ساقتاندىرۋ جۇيەسىنىڭ ءتيىمدى ەكەنىن دامىعان ەلدەردىڭ، اسىرەسە وەسر تاجىريبەسى كورسەتىپ وتىر. ولاردىڭ تاجيربەسى بۇل جۇيەنىڭ 3 ماسەلەنى شەشكەنىن بايقادىق. بىرىنشىدەن، كلينيكالاردىڭ باسىم كوپشىلىگى ناۋقاستاردى ەمدەۋ ءۇشىن ەڭ جاقسى جاعداي جاساۋعا وتكەن. ولاي بولماسا، ول قارجى الا المايدى، سەبەبى قاراجات اۋرىپ قالعان ازامات تاڭداعان كلينيكاعا تولەندى. ەكىنشىدەن، ازاماتتىڭ دەنساۋلىعىن قورعاۋ بويىنشا جاۋاپكەرشىلىكتى تەك مەملەكەتكە ەمەس، سونىمەن بىرگە جۇمىس بەرۋشى مەن جۇمىسكەرلەرگە جۇكتەۋدى قاراستىرعان جالعىز جۇيە دە وسى. ۇشىنشىدەن، جۇيەنىڭ ىنتىماقتى قاعيداتتا جۇمىس ىستەۋى مەديتسينالىق كومەكتىڭ بارلىق ءتۇرىنىڭ قولجەتىمدىلىگىن قامتاماسىز ەتەدى»، - دەدى ت. دۇيسەنوۆا.
ونىڭ ايتۋىنشا، قازىر مەملەكەت باسشىسىنىڭ تاپسىرماسى اياسىندا وسى وزىق تاجىريبەنى ەنگىزۋ بويىنشا ءتيىستى جۇمىس اتقارىلىپ جاتىر. ونىڭ ءبىرىنشىسى - جۇيەمەن قامتىلماعان ازاماتتاردىڭ مارتەبەسىن انىقتاۋ.
«قازىر وڭىرلەردە ءتيىستى شتابتار قۇردىق. تۇگەندەۋ جۇمىستارى كەزەڭ- كەزەڭمەن ءجۇرىپ جاتىر. 130 مىڭ ازامات بويىنشا بۇل جۇمىس اياقتالدى، ەندى 750 مىڭ ادامعا قاتىستى ءتيىستى جۇمىس باستالدى. ناتيجەسىندە، الەۋمەتتىك وسال توپقا جاتاتىن ازاماتتار ءۇشىن مەملەكەت، ال جۇمىس ىستەيتىن ازاماتتار ءۇشىن جۇمىس بەرۋشىلەر جانە ازاماتتاردىڭ وزدەرى جارنا تولەيتىن بولادى»، - دەدى ۆيتسە- پرەمەر.
بۇدان بۇرىن حابارلانعانداي، قر دەنساۋلىق ساقتاۋ مينيسترلىگى مەديتسينالىق ساقتاندىرۋدان تىس قالعان حالىقتىڭ ءبىر بولىگىن قامتۋعا قاتىستى تۇسىنىك بەردى. سەبەبى وسى ادامدار سكرينينگ، مەديتسينالىق تەكسەرۋمەن قامتىلماي وتىر.
اۆتور
رۋسلان عابباسوۆ