«ميلتون» داۋىلى: ا ق ش- تاعى وتانداستارىمىزعا جەرگىلىكتى بيلىكتىڭ نۇسقاۋىن مۇلتىكسىز ورىنداۋعا ۇندەدى

استانا. KAZINFORM - قازاقستان رەسپۋبليكاسىنىڭ ا ق ش- تاعى ەلشىلىگى «ميلتون» داۋىلى فلوريدا شتاتىنىڭ باتىس جاعالاۋىنا سوعۋى مۇمكىن بولعاندىقتان سونداعى وتانداستارىمىزعا مەيىلىنشە ساق بولىپ، جەرگىلىكتى بيلىكتىڭ نۇسقاۋىن مۇلتىكسىز ورىنداۋعا شاقىردى.

ا ق ش- تىڭ ۇلتتىق اۋا رايى قىزمەتى گرينۆيچ ۋاقىتىمەن ساعات 23:00 شاماسىندا داۋىلدىڭ ەڭ كۇشتى لەبى سوعاتىن «كوز قابىرعاسى» (نەمەسە «كوزى») دەپ اتالىپ كەتكەن پەريمەترى - ەڭ قاۋىپتى بولىگى جاعالاۋعا جەتكەنىن حابارلادى.

«ميلتون» فلوريداعا جەتكەنگە دەيىن ءبىرشاما باسەڭدەپ، ەڭ قاۋىپتى بەسىنشى ساناتتان تورتىنشىگە، سودان كەيىن ءۇشىنشى ساناتقا (جەل جىلدامدىعى 208 ك م/ساعات) اۋىستىرىلدى.

الايدا، ساراپشىلاردىڭ تۇسىندىرۋىنشە، «ميلتوننىڭ» قاۋىپى ءالى دە سەيىلمەي تۇر: ەۆاكۋاتسيالانباعان ادامدار ءۇشىن جەلدىڭ جىلدامدىعى 4,5 مەترگە دەيىن جەتەتىن تولقىن تۋدىرىپ، جاقىن ماڭداعى اۋماقتاردى سۋ باسىپ كەتۋ قاۋپى بار، سونداي-اق ول تەڭىز جاعاسىنان الىس جەرلەردە دە سۋ تاسقىنىن تۋدىراتىن كۇشتى نوسەرگە سەبەپ بولۋى مۇمكىن.

BBC حابارلاۋىنشا، امەريكانىڭ داۋىلداردى زەرتتەۋ ۇلتتىق ورتالىعى گرينۆيچ ۋاقىتىمەن تۇنگى ساعات ەكىنىڭ شاماسىندا «ميلتون» داۋىلى قۇرلىققا جەتكەننەن كەيىن ءبىرشاما باسەڭدەپ، ەكىنشى ساناتقا اۋىسقانىن جاريالادى.

2-ساناتتاعى داۋىلدى جەلدىڭ تۇراقتى جىلدامدىعى - 154-177 ك م/ساعات.

ەۋروپادا قابىلدانعان بوفورت شكالاسى بويىنشا تۇراقتى (ەكپىنسىز) جىلدامدىعى 118 ك م/ساعات بولاتىن جەل داۋىل بولىپ سانالادى. ساففير-سيمپسون شكالاسى بويىنشا داۋىل ساناتتارى دا وسى بەلگىدەن باستالادى.

قازىرگى كەزدە «ميلتوننىڭ» ورتالىعى فلوريدا تۇبەگى ارقىلى سولتۇستىك-شىعىسقا، اتلانت مۇحيتىنا قاراي جىلجىپ بارادى.

«قۇرمەتتى وتانداستار! ⠀ا ق ش- تىڭ ۇلتتىق داۋىلدار ورتالىعىنىڭ مالىمەتىنە سايكەس، 10-قازانعا قاراعان ءتۇنى، شامامەن ساعات 01:00- 02:00 دە مەكسيكا شىعاناعىنىڭ وڭتۇستىگىندە باستالعان «ميلتون» داۋىلى فلوريدا شتاتىنىڭ باتىس جاعالاۋىنا سوعۋى مۇمكىن. سونداي-اق داۋىل دجوردجيا جانە وڭتۇستىك كارولينا شتاتتارىنىڭ كەيبىر اۋماقتارى ارقىلى ءوتۋى مۇمكىن. فلوريدا شتاتىنىڭ جەرگىلىكتى بيلىگى بىرنەشە وكرۋگتە مىندەتتى ەۆاكۋاتسيا شارالارىن جاريالادى. بارلىق تۇرعىندار تابيعي اپات ءقاۋپى تۋىنداعان جاعدايدا ەۆاكۋاتسياعا دايىن بولۋى ءتيىس. ⠀قازاقستان رەسپۋبليكاسىنىڭ ا ق ش- تاعى ەلشىلىگى جەرگىلىكتى بيلىكتىڭ نۇسقاۋلارىن مۇلتىكسىز ورىنداۋعا شاقىرادى. كومەك قاجەت بولعان جاعدايدا ەلشىلىككە دەرەۋ حابارلاسۋلارىڭىزدى سۇرايمىز. قازاقستان رەسپۋبليكاسىنىڭ ا ق ش- تاعى ەلشىلىگىنىڭ تاۋلىك بويى «جەدەل جەلىسى»: 12025956467+، 16262516253+ ءوز قاۋىپسىزدىگىڭىزگە ساق بولىڭىز جانە اۋا رايىنا بايلانىستى جاڭارتىلعان اقپاراتتاردى مۇقيات قاداعالاڭىز»، - دەپ حابارلادى ەلشىلىك.