مىڭداعان تەلەفون بۇعاتتالۋى مۇمكىن: جاڭا دەرەك بەلگىلى بولدى
استانا. KAZINFORM – قازاقستاندا جەكە تۇلعالار ءۇشىن سمارتفونداردى تەگىن ۆەريفيكاتسيالاۋ مەرزىمى 25-ماۋسىمعا دەيىن ۇزارتىلدى. بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيالار كوميتەتىنىڭ ءتوراعاسى دامير سەيسەمبەكوۆ مالىمدەدى.
ونىڭ ايتۋىنشا، ەلگە 25-ناۋرىزعا دەيىن اكەلىنىپ، ۇيالى بايلانىس جەلىسىنە قوسىلعان سمارتفوندارعا مىندەتتى ۆەريفيكاتسيا جۇرگىزىلمەيدى.
«25-ناۋرىزعا دەيىن اكەلىنىپ، ەلىمىزدىڭ ازاماتتارى قولدانا باستاعان بارلىق سمارتفون ۆەريفيكاتسيالانعان بولىپ سانالادى. ولاردىڭ IMEI كودتارى اۆتوماتتى تۇردە «اق» تىزىمگە ەنگىزىلدى»، - دەدى سەيسەمبەكوۆ و ك ق بريفينگىندە.
كاسىپكەرلەر مەن حالىقتان تۇسكەن وتىنىشتەر كوپ بولۋىنا بايلانىستى كاسىپكەرلەر ءۇشىن سمارتفونداردى زاڭداستىرۋ مەرزىمى بۇعان دەيىن 25-مامىرعا دەيىن ۇزارتىلعان بولاتىن.
«بۇل مەرزىمدى 25-ناۋرىزعا دەيىن تەلەفونداردى اكەلىپ، ءبىراق ساتا الماي قالعان بيزنەسكە بەردىك. مۇنداي قۇرىلعىلار قويمادا نەمەسە سورەلەردە تۇرعان، ءبىراق جەلىگە تىركەلمەگەن بولۋى مۇمكىن. ءبىز ساتىپ الۋشىلارعا بۇل قۇرىلعىلاردى بازاعا ەنگىزۋ مۇمكىندىگىن قاراستىردىق»، - دەدى كوميتەت ءتوراعاسى.
25-مامىردان باستاپ يمپورتتاۋشىلار ءۇشىن تەگىن ۆەريفيكاتسيا توقتاتىلادى. ءار قۇرىلعىنىڭ زاڭدى جولمەن اكەلىنگەنىن دالەلدەۋ تالاپ ەتىلەدى. سونىمەن قاتار، مينيسترلىك جەكە تۇلعالار ءۇشىن ۆەريفيكاتسيالاۋ مەرزىمىن تاعى ءبىر ايعا ۇزارتۋ تۋرالى شەشىم قابىلدادى.
«جەكە تۇلعالارعا ارنالعان قۇرىلعىلاردى تەگىن ۆەريفيكاتسيالاۋ مەرزىمى 25-ماۋسىمعا دەيىن ۇزارتىلدى. ەگەر ءسىز اقپاندا نەمەسە ساۋىردە تەلەفون ساتىپ الىپ، ونى قوسىپ ۇلگەرمەگەن بولساڭىز نەمەسە شەتەلدەن اكەلگەن بولساڭىز، 25-ماۋسىمعا دەيىن تەگىن ۆەريفيكاتسيادان وتە الاسىز. ءبىر ادامعا ەكى قۇرىلعىعا دەيىن ۆەريفيكاتسيا جاساۋعا رۇقسات. بۇل eGov Mobile پورتالى ارقىلى جۇزەگە اسىرىلادى»، - دەدى سەيسەمبەكوۆ.
ول ۆەريفيكاتسيا زاڭسىز اكەلىنگەن، ۇرلانعان قۇرىلعىلاردى ساتپاۋ ءۇشىن قاجەت ەكەنىن ەسكە سالدى.
ەسكە سالايىق، بۇعان دەيىن قازاقستاندا مىڭداعان تەلەفون بۇعاتتالۋى مۇمكىن ەكەنى حابارلاندى.
قۇرىلعىنى ساتىپ الماس بۇرىن ونىڭ IMEI كودىن https://imei.rfs.gov.kz سايتىنان تەكسەرۋگە بولادى. بۇل ازاماتتارعا جالعان نەمەسە ۇرلانعان تەلەفون ساتىپ الۋدان ساقتانۋعا مۇمكىندىك بەرەدى.