الا اكىمىنىڭ باسپا ءسوز قىزمەتى حابارلاعانداي، ۇلتتىق رۋحتاعى شەرۋ ى. جاقايەۆ كوشەسىنەن باستالىپ، ونەر ارباتى ارقىلى ورتالىق الاڭعا دەيىن سوزىلدى.
«ۇلت مۇراسى - ۇلتتىق كيىم» اتتى شەرۋگە مىڭعا جۋىق ادام قاتىسىپ، ۇلتتىق بولمىس پەن ءداستۇر ساباقتاستىعىن ايشىقتاي ءتۇستى.
شەرۋدى مادەنيەت سالاسىنىڭ ءبىر توپ ۇزدىگى مەن رۋحانيات جاناشىرى، «سىرلى ساز» ەتنو-فولكلورلىق انسامبلى باستاپ ءجۇردى. قازاقى ۇلگىدە كيىنگەن ونەرپازدار حالىق اندەرىن اۋەلەتە شىرقاپ، ونەر ارباتىنداعى ساحناعا ەرەكشە ءسان-سالتاناتپەن جەتتى. بۇل كورىنىس كوپشىلىككە ۇمىتىلماس اسەر سىيلاپ، ناۋرىز مەرەكەسىنىڭ شىنايى رۋحىن سەزىندىردى.
بەلگىلەنگەن ورىنعا جينالعان سوڭ وقۋ ورىندارىنىڭ ستۋدەنتتەرى ۇلتتىق بي ونەرىنىڭ جاۋھارى - «قاراجورعا» ءبيىن ناقىشىنا كەلتىرە ورىنداپ، كوپشىلىكتىڭ ىستىق ىقىلاسىنا بولەندى.
ال «كۇمىس دومبىرا - 2025» بايقاۋىنىڭ يەگەرى بەكسۇلتان ورىنباسار ساحنا تورىندە جۇرەكجاردى ارناۋىن ۇسىندى.
قالالىق مادەنيەت جانە تىلدەردى دامىتۋ ءبولىمىنىڭ باسشىسى ايدىن قايرۋللايەۆ ءسوز الىپ، قالا تۇرعىندارىن ۇلىستىڭ ۇلى كۇنىمەن قۇتتىقتادى.
- اۋقىمدى شارانىڭ باستى ماقساتى - قازاق حالقىنىڭ باي مادەني مۇراسىن دارىپتەۋ، ۇلتتىق كيىم ۇلگىلەرىن كەڭىنەن ناسيحاتتاۋ، وسكەلەڭ ۇرپاقتىڭ بويىندا ۇلتتىق قۇندىلىقتارعا قۇرمەت قالىپتاستىرۋ، - دەلىنگەن حابارلامادا.
مەرەكەلىك شەرۋ قالا ونەرپازدارىنىڭ ءان شاشۋىمەن جالعاستى.
ال كوكشەتاۋ قالاسىندا 27 مەكتەپتىڭ 1500 وقۋشىسى ءبىر مەزەتتە «بەس اسىق» ۇلتتىق ويىنىنا قاتىستى.
اۆتور
نازەركە سانيازوۆا