موينىڭىزدا قانشا كرەديت بولسا دا، اۆتونەسيە بەرەدى

استانا. KAZINFORM - نەسيەگە كولىك الۋ قازاقتىڭ ارمانىنا اينالعالى قاشان... نەسيەگە كولىك العاندا بانكتەر نەسيە جۇكتەمەسىنىڭ كوەففيتسيەنتىنە قارامايتىن بولادى، - دەپ حابارلايدى naryk.kz.

قارجى نارىعىن رەتتەۋ جانە دامىتۋ اگەنتتىگى قاۋلى جوباسىندا ۇلتتىق بانكتىڭ قاۋلىسىنا بانكتەرگە ارنالعان پرۋدەنتسيالدىق نورماتيۆتەردى جانە ميكروقارجى ۇيىمدارى كليەنتتەرىنىڭ بورىشتىق جۇكتەمەسىن ەسەپتەۋ قاعيدالارىن رەتتەيتىن وزگەرىستەر قاراستىرىلعان.

«جوبا مەرزىمدى تولەمدەر مەرزىمىن ۇلعايتۋعا اكەپ سوعاتىن نەسيەلەردى قايتا قۇرىلىمداۋ كەزىندە مەرزىمى وتكەن بەرەشەگى بار قارىز الۋشىلاردىڭ بەرەشەك كوەففيتسيەنتىن ەسەپتەۋ تالابىن جويۋ ماقساتىندا ازىرلەنگەن. ماقسات - وتاندىق اۆتوموبيل ونەركاسىبىن دامىتۋدى قولداۋ جانە ىنتالاندىرۋ، سونداي-اق جەڭىلدەتىلگەن اۆتونەسيە شارتتارىمەن ساتىلاتىن اۆتوكولىكتەردى ساتۋ ماقساتىندا»، - دەلىنگەن قوعامدىق تالقىلاۋعا جاريالانعان قۇجاتتا.

اتاپ ايتقاندا، قاۋلى جوباسىندا دارمەنسىز قارىز الۋشىلار، سونداي-اق جاڭا كولىك قۇرالىن ساتىپ الۋ ماقساتىندا بەرىلگەن قارىز الۋشىلار سانىنىڭ ارتۋىنا جول بەرمەۋ ماقساتىندا قايتا قۇرىلىمداۋ كەزىندە كرەديتتەر بويىنشا بەرەشەك كوەففيتسيەنتىن ەسەپتەۋ تالابىن الىپ تاستاۋ كوزدەلگەن. 2024 - جىلعى 1-ءساۋىر مەن 31-جەلتوقساندى قوسا العاندا، بۇل تالاپ وسى كولىك قۇرالىنىڭ كەپىلىمەن قامتاماسىز ەتىلگەن جاڭا كولىك قۇرالىن ساتىپ الۋ ماقساتىندا بەرىلگەن نەسيەلەرگە قولدانىلمايدى. بۇل نورما وتاندىق اۆتوموبيل ونەركاسىبىنىڭ دامۋىن ىنتالاندىرادى دەپ كۇتىلىپ وتىر.

قارىز الۋشىنىڭ اۆتوكولىك قۇرالىنىڭ كەپىلىمەن قامتاماسىز ەتىلگەن كرەديتتەر بويىنشا بورىش جۇكتەمەسىنىڭ كوەففيتسيەنتىن ەسەپتەۋ كەزىندە قارىز الۋشىنىڭ كرەديت بويىنشا اي سايىنعى تولەمىنىڭ مولشەرى اۆتوكولىك قۇرالى تۇرىندەگى كەپىل قۇنىنا ازايتىلعان، وتىمدىلىك كوەففيتسيەنتىنە تۇزەتىلگەن وتەلۋگە ءتيىس بەرەشەك سوماسىنىڭ (نەگىزگى بورىش سوماسىنان جانە كرەديتتىڭ بۇكىل كەزەڭى ءۇشىن ەسەپتەلەتىن سىياقىدان تۇراتىن) بەرىلەتىن كرەديتتىڭ ايلارمەن كورسەتىلگەن مەرزىمىنە 0,7 گە تەڭ قامتاماسىز ەتۋ قۇنىنا قاتىناسى رەتىندە ايقىندالادى.

تۇزەتۋلەردىڭ نەگىزدەمەسى اۆتوكولىك كەپىلىمەن قامتاماسىز ەتىلگەن نەسيەلەر وتەلمەۋ قاۋپىنە جانە اۆتونەسيە/ميكروكرەديتتى وتەۋ مۇمكىن ەمەستىگىنە از ۇشىرايتىنىن اتاپ وتەدى، ويتكەنى مەرزىمى وتكەن بەرەشەك كەپىلگە قويىلعان كولىكتى ساتۋ ارقىلى وتەلەدى. سونىمەن قاتار، كولىك ك ا س ك و(كولىك قۇرالدارىنىڭ ءوزىن عانا ساقتاندىرۋ - رەد.)  ساقتاندىرۋىمەن قامتىلعان.

سونىمەن قاتار قارىز الۋشىنىڭ كىرىسىن باعالاۋ كەزىندە بانكتىك نەسيەلەر بويىنشا تولەمدەر دە، شاعىن نەسيەلەر دە ەسكەرىلەتىن بولادى. قازىرگى ۋاقىتتا كىرىستى باعالاۋ كەزىندە قارىز الۋشىنىڭ سوڭعى التى قاتارىنان كۇنتىزبەلىك ايداعى وتەلگەن نەمەسە وتەلمەگەن بانكتىك قارىزدارى بويىنشا اي سايىنعى تولەمدەرى عانا ەسەپكە الىنادى.

قۇجات 15-مامىرعا دەيىن كوپشىلىك الدىندا تالقىلانادى. قاۋلى 2024 - جىلعى 1-ساۋىردەن باستاپ قولدانىسقا ەنگىزىلەدى جانە رەسمي جاريالانۋعا ءتيىس.