موڭعوليادا مەرەكەلىك شەرۋگە 1 مىڭنان اسا ەگىز قاتىستى
استانا. KAZINFORM - ۇلان-باتىردىڭ ورتالىق الاڭىندا موڭعوليانىڭ ەگىزدەر قاۋىمداستىعىنىڭ 35 جىلدىعىنا ارنالعان مەرەكەلىك شەرۋ ءوتتى، دەپ حابارلايدى مونتسامە.
موڭعولياداعى العاشقى «ەگىزدەر كۇنى» 1990-جىلى 1-مامىردا «قوس اۋەن» دەگەن اتپەن اتاپ ءوتىلدى، سول كەزدە شەرۋگە 57 ەگىز قاتىسقان ەدى.
2025-جىلعى شەرۋگە حەنتيي، دۋندگوۆ جانە دورنوگوۆ سياقتى سەگىز ايماقتان 1000 نان استام ەگىز قاتىستى. مىسالى، ولاردىڭ اراسىندا دۋندگوۆ ايماعىنان كەلگەن ەگىزدەر دە بولدى: موڭعولياداعى العاشقى ۇشەمدەر جانە ەلدىڭ ەكى ميلليونىنشى ازاماتتارى اتانعان ەگىزدەر، سونداي-اق ولاردىڭ ەگىز بالالارى.
2006-جىلدان بەرى شەرۋگە اتسالىسىپ كەلە جاتقان ۇشەمدەر - د. تسەرماا، د. دەنسماا جانە د. گۋنسماا 1950-جىلى 1-تامىزدا دۋندگوۆ ايماعىنىڭ دەلگەرتسوگت اۋىلىندا دۇنيەگە كەلگەن. م ح ر پ باس حاتشىسى يۋمجااگين تسەدەنبالدىڭ ولاردى اۋرۋحانادان ۇيلەرىنە جەتكىزگەنىن ەسكە العان ۇشەمدەر ءوز سەزىمدەرىن ءبولىستى.
- مەرەكەدە كىشكەنتاي ەگىزدەردى كورىپ، ءبىز قاتتى تولقىدىق. ۇشەۋمىز دە كوپبالالى انا بولدىق. ءبىزدىڭ وتباسىمىزدا ءبىز دۇنيەگە كەلگەنگە دەيىن ەگىزدەر بولماعان، ءبىراق قازىر نەمەرەلەرىمىز بەن شوبەرەلەرىمىز وسى سيرەك ەرەكشەلىكپەن دۇنيەگە كەلىپ جاتىر. موڭعوليانىڭ بارلىق ەگىزىنە مەرەكە قۇتتى بولسىن! - دەدى ولار.
تۋۆ ايماعىنىڭ تۇرعىنى گ. مۋنحتسەتسەگ 2014-جىلى ۇشەم دۇنيەگە اكەلگەنىن ايتتى.
- بۇلار ۇشەم ەكەنىن بىلگەندە، قورقىپ، تاڭعالىپ، سونىمەن قوسا قاتتى قۋاندىم. ۇشەم ۇلداردىڭ ەكى اپكەسى بار. ولار تۋعان كەزدە اپكەلەرى 2 جانە 4 جاستا بولدى. بەس كىشكەنتاي بالانى تاربيەلەۋ وڭاي بولعان جوق، ءبىراق وتباسىنىڭ قولداۋىمەن ولاردى جاقسى ادام ەتىپ وسىرۋگە تىرىسامىز، - دەدى مۋنحتسەتسەگ.
تۋۆ ايماعىنداعى مامانداندىرىلعان سپورت مەكتەبىنىڭ 5-سىنىپ وقۋشىلارى ا. ۋۋدامزاياا، ا. ۋدامزاياا جانە ا. ۋۋجيمزاياا دوستارى ولاردىڭ قالاي اجىراتاتىنىن ايتىپ بەردى.
- ادامدار بىزگە قاراپ: «قانداي ادەمى!» دەيدى. ءبىزدى ءبىر-بىرىمىزدەن وڭاي اجىراتادى. دوستارىمىز ءبىزدى مىنەزىمىزگە، قىزىعۋشىلىقتارىمىزعا جانە بەتىمىزدەگى مەڭدەرگە قاراپ اجىراتا الاتىنىن ايتادى. ەگىزدەر شەرۋىنە العاش رەت كەلىپ، اجەلەر مەن اتالاردى، اعا-اپكەلەردى جانە ءبىر جاستاعى ەگىز بالالاردى كورگەندە، ءبىز ۇشەمدەردىڭ كوپتىگىنە تاڭعالدىق، - دەپ ءبولىستى ولار.
ۇشەمدەردىڭ ايتۋىنشا، ولار كاسىپكەر، دارىگەر جانە اسپاز بولۋدى ارماندايدى.
ۇلتتىق ستاتيستيكا كوميتەتىنىڭ مالىمەتتەرى بويىنشا، موڭعوليادا 21277 ەگىز بار.
وسىعان دەيىن موڭعوليادا 2026-جىل ءبىلىم بەرۋدى قولداۋ جىلى دەپ جاريالانعانىن جازعانبىز.