موڭعوليادا جىلدىق ينفلياتسيا 5,7 پايىزعا جەتتى

استانا. KAZINFORM — موڭعوليادا 2024 -جىلدىڭ مامىر ايىندا جىلدىق ينفلياتسيا 5,7 پايىزدى قۇرادى. بۇل تۋرالى ەلدىڭ ۇلتتىق ستاتيستيكالىق قىزمەتى حابارلادى، دەپ جازادى شينحۋا اگەنتتىگى.

جىلدىق ينفلياتسيانىڭ قالىپتاسۋىنا ءدارى- دارمەكتىڭ، مەديتسينالىق قىزمەتتىڭ 7 پايىزعا ءوسۋى تىكەلەي اسەر ەتكەن. ال، وندىرىستىك تاۋارلار، الكوگولسىز سۋسىندار مەن مينەرالدى سۋسىنداردىڭ باعاسى 6,7 پايىزعا سونداي- اق كيىم-كەشەك، تەكستيل جانە اياق كيىمنىڭ باعاسى 5,8 پايىزعا، مەبەل مەن تۇرمىستىق تەحنيكا، ەلەكترونيكا 5,4 پايىزعا وسكەنى اسەر ەتكەنى حابارلاندى.

موڭعوليا ورتالىق بانكىنىڭ مالىمەتى بويىنشا، 2024 -جىلدىڭ ءساۋىر ايىندا ەلدەگى جىلدىق ينفلياتسيا 6,4 پايىزدى قۇرادى. الايدا ەلدەگى 3,5 ميلليون حالىقتىڭ جارتىسىنان استامى تۇراتىن ەلدىڭ استاناسى ۇلان- باتوردا بۇل كورسەتكىش 6,1 پايىزدى قۇرادى.

ۇلتتىق ستاتيستيكا كوميتەتىنىڭ مالىمەتىنە سەنسەك، موڭعوليانىڭ جالپى ىشكى ءونىمى 2024 -جىلدىڭ ءبىرىنشى توقسانىندا وتكەن جىلدىڭ سايكەس كەزەڭىمەن سالىستىرعاندا 7,8 پايىزعا وسكەن.

بۇل رەتتە دۇنيەجۇزىلىك بانك ساراپشىلارى موڭعولياداعى ەكونوميكالىق ءوسىم نەگىزىنەن تاۋ-كەن سەكتورىنداعى ءوندىرىس كولەمىنىڭ ارتۋى، جەكە تۇتىنۋدىڭ قالپىنا كەلۋى جانە فيسكالدىق ەكسپانسياعا قاتتى تاۋەلدىلىك ەسەبىنەن بولادى دەپ بولجايدى.