موڭعوليا يۋنەسكو قولداۋىمەن ۇلتتىق اتلاسىن سيفرلاندىردى

استانا. KAZINFORM - موڭعوليا عىلىم اكادەمياسىنىڭ گەوگرافيا جانە گەوەكولوگيا ينستيتۋتى يۋنەسكو- نىڭ قاتىسۋ باعدارلاماسىنىڭ قولداۋىمەن «موڭعوليانىڭ ۇلتتىق ەلەكتروندى اتلاسى» جوباسىن جۇزەگە اسىرىپ، ونى كەڭ جۇرتشىلىققا قولجەتىمدى ەتتى، دەپ جازادى مونتسامە.

موڭعوليانىڭ ۇلتتىق اتلاسى - ەلدىڭ ءومىرى، تاريحى، مادەنيەتى مەن گەوگرافياسى تۋرالى جان- جاقتى عىلىمي جانە تانىمدىق اقپاراتتى قامتيتىن ماڭىزدى باسىلىم. وندا اۋماق، اكىمشىلىك ءبولىنىس، تابيعي جاعدايلار، رەسۋرستار، حالىق، تاريح، مادەنيەت، قوعام جانە ەكونوميكا تۋرالى مالىمەتتەر جيناقتالعان.

ەلەكتروندى اتلاس بەس نەگىزگى بولىمگە توپتاستىرىلعان 132 تاقىرىپتىق كەسكىندى قامتيدى جانە ول موڭعول جانە اعىلشىن تىلدەرىندە دايىندالعان. ءاربىر كەسكىننىڭ اۆتورلارى مەن ونى دايەكتەۋ ۇلگىسى كورسەتىلگەن. سونىمەن قاتار اتلاستا 1990، 2009 جانە 2022 -جىلدارى جارىق كورگەن «موڭعوليانىڭ ۇلتتىق اتلاسىنان» الىنعان قىسقاشا مازمۇندار جانە ولاردى ازىرلەۋگە قاتىسقان رەداكسيالىق القا مۇشەلەرى تۋرالى اقپارات بار.

بۇل باسىلىمدار قولدانۋشىنىڭ ورنالاسقان جەرىنە، جاسىنا، جىنىسىنا، ۇلتىنا نەمەسە ەكونوميكالىق جاعدايىنا قاراماستان، بارلىعىنا اشىق. جوبا - بىرەگەي عىلىمي اقپاراتتى قولجەتىمدى ەتىپ، حالىقارالىق عىلىمي ىنتىماقتاستىقتى كەڭەيتۋگە ىقپال ەتەتىن ماڭىزدى باستاما.

اتالعان جوبانى جۇزەگە اسىرۋ - يۋنەسكو- نىڭ اشىق عىلىم جونىندەگى ۇسىنىمدارىن ورىنداۋعا قوسىلعان ەلەۋلى ۇلەس. بۇل ۇسىنىمدار ءارتۇرلى تىلدەردە عىلىمي ءبىلىمدى ەركىن تاراتۋ مەن اقپارات الماسۋدى دامىتۋعا باعىتتالعان.

اتلاستىڭ تانىستىرىلىمىنا موڭعولياداعى يۋنەسكو ىستەرى جونىندەگى ۇلتتىق كوميسسيانىڭ باس حاتشىسى س. بولدسايحان، پارلامەنت دەپۋتاتى جانە اكادەميك د. رەگدەل، ەكونوميكا جانە دامۋ مينيسترلىگىنىڭ عىلىم، تەحنولوگيا جانە يننوۆاتسيا ساياساتىن ۇيلەستىرۋ باسقارماسىنىڭ باسشىسى د. باتتوگتوح، موڭعوليا ۇلتتىق ۋنيۆەرسيتەتىنىڭ وقىتۋشىسى، PhD دوكتورى ساينبۋيان، گيدرومەتەورولوگيا، ەكولوگيالىق زەرتتەۋلەر جانە اقپارات ينستيتۋتىنىڭ عىلىمي حاتشىسى، PhD دوكتورى پ. گومبولۋدەۆ، سونداي-اق گەوگرافيا جانە گەوەكولوگيا ينستيتۋتىنىڭ اعا عىلىمي قىزمەتكەرى، PhD دوكتور ج. ويۋۋنگەرەل قاتىستى.

ايتا كەتۋ كەرەك، الەمنىڭ كوپتەگەن ەلىندە ۇلتتىق اتلاستار ەلدىڭ ەلتاڭباسى، تۋى جانە انۇرانىمەن قاتار مەملەكەتتىك ماقتانىشتىڭ سيمۆولى بولىپ سانالادى. قازىرگى ۋاقىتتا 70 تەن استام ەلدىڭ ۇلتتىق اتلاستارى بار، ولاردىڭ شامامەن 20 سى ەلەكتروندىق فورماتتا ۇسىنىلعان.