موڭعوليا مەن قىتايدان كەلگەن ەتنيكالىق قازاقتار سانى رەكوردتىق كورسەتكىشكە جەتتى

استانا. قازاقپارات - 2024 -جىلدىڭ العاشقى ءۇش توقسانىندا قىتايدان قازاقستانعا تۇراقتى مەكەنگە 1451 ادام، ال موڭعوليادان 1088 ادام كوشىپ كەلگەن، دەپ حابارلايدى Ulysmedia.kz.

DataHub تەلەگرام ارناسىنىڭ جازۋىنشا، بۇل كورسەتكىش 2023 -جىلدىڭ سايكەس كەزەڭىمەن سالىستىرعاندا شامامەن ءۇش ەسە ارتىق، ءوسىم تيىسىنشە 177 پايىز جانە 172 پايىزدى قۇرايدى.

قىتايدان كەلگەن قانداستار سانى 2017 -جىلدان بەرى ەڭ جوعارعى دەڭگەيگە جەتسە، موڭعوليادان كەلگەندەر اراسىندا مۇنداي كورسەتكىش 2011 -جىلدان بەرى بايقالماعان.

قازاقستاننان قىتاي مەن موڭعولياعا قونىس اۋدارعانداردىڭ سانى از، سوندىقتان ميگراتسيالىق سالدو وڭ بولىپ تۇر.

كەلۋشىلەر تۋرالى مالىمەت

- قىتايدان دا، موڭعوليادان دا كەلگەندەردىڭ بارلىعى دەرلىك قازاق ۇلتىنان (98 پايىز جانە 99 پايىز).

- قىتايدان كەلگەندەردىڭ جارتىسى استانا نەمەسە الماتى قالالارىنا، تاعى 20 پايىزى الماتى وبلىسىنا قونىستانعان.

- موڭعوليادان كەلگەندەردىڭ كوبىسى اقمولا وبلىسىنا (33 پايىز) قونىستانسا، قالعاندارى استاناعا (23 پايىز) جانە الماتىعا (13 پايىز) ورنالاسقان.

2024 -جىلدىڭ العاشقى ءۇش توقسانىندا قازاقستانعا جالپى 20,4 مىڭ ادام كەلگەن، بۇل وتكەن جىلمەن سالىستىرعاندا 6,5 پايىز ارتىق. ال ەلدەن كەتكەندەردىڭ سانى شامامەن 10,2 مىڭدى قۇرادى، بۇل وتكەن جىلمەن سالىستىرعاندا 20 پايىزعا تومەن. ناتيجەسىندە، ميگراتسيالىق سالدو 59 پايىزعا ءوسىپ، 10,2 مىڭ ادامدى قۇرادى.

حالىق سانى

ۇلتتىق ستاتيستيكا بيۋروسىنىڭ مالىمەتىنشە، 1-قازانداعى جاعداي بويىنشا ەلدەگى حالىق سانى 20223218 ادامدى قۇرادى، ونىڭ ىشىندە قالا تۇرعىندارى – 12704977، اۋىل تۇرعىندارى - 7518241 ادام. توعىز ايدا حالىقتىڭ جالپى ءوسىمى 189376 ادامعا جەتتى.

2024 -جىلدىڭ 9 ايىندا قازاقستاندا 278,7 مىڭ بالا دۇنيەگە كەلدى، قايتىس بولعاندار سانى - 99,5 مىڭ ادام. وسىلايشا، حالىقتىڭ تابيعي ءوسىمى 179,2 مىڭ ادامدى قۇرادى.

تۇركىستان وبلىسى كوش باستاپ تۇر

تۋۋدىڭ ەڭ جوعارى دەڭگەيى تۇركىستان وبلىسىندا (1000 تۇرعىنعا 25,04 ادام)، ماڭعىستاۋ وبلىسىندا (24,84) جانە شىمكەنت قالاسىندا (23,68) بايقالدى.

ءولىم-ءجىتىمنىڭ ەڭ جوعارى دەڭگەيى سولتۇستىك قازاقستان وبلىسىندا (1000 تۇرعىنعا 11,52)، شىعىس قازاقستان وبلىسىندا (11,32) جانە قوستاناي وبلىسىندا (10,12)، بۇل وسى وبلىستار حالقىنىڭ جاس قۇرىلىمىنا بايلانىستى.

العاشقى جارتى جىلدىڭ ىشىندە 95 ​​مىڭ نەكە قيىلىپ، 29,3 مىڭ اجىراسۋ تىركەلگەن.