مەسسي فۋتبول تاريحىندا ەڭ كوپ جۇلدە جەڭىپ العان ويىنشى اتاندى

  تانىمال فۋتبولشى ليونەل مەسسي ارگەنتينا قۇراماسىمەن امەريكا كۋبوگى جارىسىندا جەڭىمپاز اتاندى. وسىلايشا مانسابىنداعى ماڭىزدى 45- جۇلدەسىنە قول جەتكىزىپ، رەكورد ورناتتى.

37 جاستاعى شابۋىلشى 44 چەمپيوندىق اتاق جەڭىپ العان داني الۆەستى باسىپ وزدى. بۇعان دەيىن ەكەۋىنىڭ جۇلدەلەر سانى تەڭ بولعان ەدى. ەندى مەسسي تەڭدەسسىز رەكورد يەسى. بىردە-ءبىر فۋتبولشى 45 چەمپيوندىق جۇلدە ەنشىلەمەگەن.

ەڭ كوپ جۇلدە ەنشىلەگەن فۋتبولشىلاردىڭ ۇشتىگىن مىسىرلىق جارتىلاي قورعاۋشى حوسسام اشۋر تۇيىندەيدى. ول "ءال- احلي" كومانداسى ساپىندا ويناپ، 39 جۇلدە جەڭىپ العان.

امەريكا كۋبوگىندا مەسسي 4 ويىن وتكىزدى، 1 گول سوعىپ، 1 ناتيجەلى پاس بەردى.