مەرت بولعان حاماس باسشىسى يسمايل حانيا تۋرالى نە بىلەمىز

استانا. KAZINFORM - حاماس قوزعالىسى ساياسي بيۋروسىنىڭ جەتەكشىسى يسمايل حانيا پالەستينانى تاۋەلسىز ەل رەتىندە تانۋعا ۇمتىلعان كۇشتى پراگماتيك رەتىندە تانىمال. ول يزرايلمەن اتىستى توقتاتۋ تۋرالى كەلىسسوزدەرگە جاۋاپتى ەدى.

يسمايل حانيا 1962 -جىلى گازا قالاسىنىڭ سولتۇستىگىندەگى شاتي پالەستينالىق بوسقىندار لاگەرىندە دۇنيەگە كەلگەن. ونىڭ وتباسى 1948 -جىلى قازىرگى يزرايل اۋماعىنان شىعارىلدى. ول ورتا جانە جوعارى ءبىلىمدى گازادا العان، ياعني اراب ادەبيەتىن وقىپ، كەيىن حاماس ۇيىمىنىڭ قاتارىنا قوسىلعان.

حاماس-تا ساياسي ىقپالعا يە بولا باستادى. ي. حانيا حاماس-تىڭ رۋحاني كوشباسشىسى جانە نەگىزىن قالاۋشى شەيح احمەد ياسيننىڭ جەكە حاتشىسى بولدى، ونى 2003 -جىلى يزرايل اسكەرلەرى ءولتىردى.

2006 -جىلى ي. حانيا ساياساتقا بەت بۇردى. ول رەسمي سايلاۋدا جەڭىسكە جەتىپ، پالەستينا اۆتونومياسىنىڭ پرەمەر-ءمينيسترى بولدى. الايدا، ءبىر جىلدان كەيىن گازا سەكتورىنداعى ساياسي پارتيالاردىڭ ىشىندەگى تۇراقسىز جاعدايعا بايلانىستى ەكى ۇكىمەت قۇرىلدى. 2007 -جىلى حاماس جاقتاستارى ي. حانيانىڭ وتستاۆكاعا كەتۋ تۋرالى جارلىعىن مويىنداۋدان باس تارتتى، سودان كەيىن ول جاڭا مينيسترلەر كابينەتىن جينادى.

2018 -جىلى ا ق ش مەملەكەتتىك دەپارتامەنتى ونى تەرروريست دەپ تانىدى، ال 2024 -جىلدىڭ مامىرىندا حالىقارالىق سوت پروكۋرورى كارىم حان ونى تۇتقىنداۋعا سانكتسيا سۇرادى. ول يزرايلگە شابۋىلدا كىسى ءولتىرۋ، كەپىلگە الۋ جانە تۇتقىندارعا زورلىق-زومبىلىق كورسەتۋ اسكەري قىلمىستارى ءۇشىن جاۋاپتى دەپ تانىلدى.

يسمايل حانيا جانە ونىڭ وتباسى مۇشەلەرىنە بىرنەشە رەت قاستاندىق جاسالدى. ونىڭ اپكەسى گازاداعى كوشباسشىنىڭ ۇيىنە باعىتتالعان شابۋىل كەزىندە قايتىس بولدى. ونىڭ 13 ۇلىنىڭ ۇشەۋى باسقا اسكەري وپەراتسيادا اجال قۇشتى.

شەتەلدىك ب ا ق ي. حانيانىڭ جەكە بايلىعىن ەسەپتەپ، 4 ميلليارد دوللارعا باعالاپ وتىر. ولاردىڭ بولجامىنشا، حانيا حاماس-قا كومەك ءۇشىن جينالعان قارجى ەسەبىنەن كولەمدى تابىس تاپقان.

بۇگىن تاڭەرتەڭ تەگەراندا حاماس باسشىسى يسمايل حانيانىڭ قازا تاپقانى تۋرالى حابارلاعان ەدىك.

اۆتور
داۋلەت ىزتىلەۋ