مۇرات نۇرتىلەۋ تۇرىكمەنستان پرەزيدەنتىمەن جۇزدەستى
تۇرىكمەنستان پرەزيدەنتى سەردار بەردىمۇحامەدوۆ قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋدى قابىلدادى، دەپ حابارلايدى Kazinform ءتىلشىسى اشحابادتان.
«وزدەرىڭىزدە بىلەتىندەي، بۇل ەلگە وسىدان 3 كۇن بۇرىن سىرتقى ىستەر ءمينيسترى راشيد مەرەدوۆتىڭ شاقىرۋىمەن كەلگەن ەدىم. ساپار اياسىندا سىرتقى ىستەر مينيسترلىگىندە كەلىسسوز ءوتتى. «ورتالىق ازيا - ە ق ى ۇ» فورماتىندا كەزدەسۋ بولدى. بۇگىن «ورتالىق ازيا - كورەيا» فورماتىندا تاعى ءبىر كەزدەسۋ وتكىزبەكپىز. مەنىڭشە، بۇل - ورتاق ماسەلەلەرىمىزدى تالقىلاۋ ءۇشىن وتە تاماشا مۇمكىندىك. ارينە، سىزدەردىڭ مەملەكەت باسشىڭىزدىڭ رەسمي قابىلداۋى تۇرىكمەنستانعا كەلۋ باعدارلامامنىڭ نەگىزگى پۋنكتى سانالادى»، - دەدى مۇرات نۇرتىلەۋ كەزدەسۋدەن كەيىن قازاقستان جانە تۇرىكمەنستان ب ا ق وكىلدەرىنە بەرگەن سۇحباتىندا.
وسى ورايدا قازاقستان سىرتقى ىستەر ءمينيسترى تۇرىكمەنستان پرەزيدەنتىنە وتە جىلى قابىلداپ، اشىق اڭگىمەلەسكەنى ءۇشىن ريزاشىلىعىن ءبىلدىردى.
«باۋىرلاس ەلگە ۇشىپ كەلگەنىمدى سەزىندىم. ءبىز ەلىمىزدىڭ ەكىجاقتى، كوپجاقتى سيپاتتاعى ىنتىماقتاستىق ماسەلەلەرىن تالقىلادىق. قازاقستان پرەزيدەنتى قاسىم-جومارت توقايەۆتىڭ سىزدەردىڭ پرەزيدەنتكە جىلى لەبىزىن، ىزگى تىلەگىن جەتكىزدىم. سونىمەن قاتار ەكىجاقتى كۇنتارتىبىنىڭ ءبىرقاتار ماسەلەسىنە قاتىستى پىكىر الماستىق. ونىڭ ىشىندە ەكىجاقتى ساياسي ديالوگىمىزدى جانداندىرۋ نەمەسە جوعارى قارقىنىن ۇستاپ تۇرۋ، ب ۇ ۇ، ي ى ۇ، ورتالىق ازيا مەملەكەت باسشىلارىنىڭ كونسۋلتاتيۆتىك كەزدەسۋلەرى سىندى كوپجاقتى قۇرىلىمدار اياسىنداعى ءىس-قيمىلىمىز جايلى سويلەستىك»، - دەدى ول.
مۇرات نۇرتىلەۋ قازاقستان مەن تۇرىكمەنستاننىڭ ۇستانىمدارى ءبىر-بىرىمەن ساي كەلەتىنىن ءسوز ەتىپ، استانا مەن اشحاباد اراسىنداعى ءوزارا ءىس-قيمىل جەمىستى بولاتىنىنا سەنىم ءبىلدىردى.
سونىمەن قاتار مينيستر ەكى ەل اراسىنداعى ساۋدا-ساتتىق قارقىنى جوعارى ەكەنىن اتاپ ءوتتى.
ايتۋىنشا، الداعى ۋاقىتتا ونىڭ كولەمىن 1 ميلليارد دوللارعا جەتكىزۋ جوسپارلانىپ وتىر.
«مۇنداي ۋاعدالاستىققا 2021 جانە 2022 -جىلدارى مەلەكەت باسشىلارى دەڭگەيىندەگى ەكىجاقتى ساپار بارىسىندا قول جەتكەن بولاتىن»، - دەدى قازاقستان سىرتقى ىستەر ءمينيسترى.
اۆتور
مارلان جيەمباي