مۇقتاج جاندارعا باسپانا ءبولۋ نەلىكتەن اكىمدىكتەن «وتباسى بانككە» ءوتتى

استانا. KAZINFORM - ونەركاسىپ جانە قۇرىلىس مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى باقىتجان جۇنىسبەكوۆ تۇرعىن ءۇي كەزەگىندە تۇرعاندارعا باسپانا ءبولۋ نەلىكتەن اكىمدىكتەن «وتباسى بانككە» وتكەنىن ايتتى.

ونىڭ اتاپ وتۋىنشە، اتالعان وكىلەتتىكتى بانككە بەرۋ پروتسەستى جەدەلدەتىپ، اشىق قىلا تۇسەدى.

- ەڭ الدىمەن مۇنى ءبىر تەرەزە قامتاماسىز ەتەدى. بۇل - مونيتورينگ، باقىلاۋ جانە ءبولۋدىڭ جەڭىلدەتىلگەن ءتارتىبى. ياعني، ازاماتتاردىڭ اكىمدىك تاراپىنان باسپانانى دۇرىس بولمەۋىنە بايلانىستى شاعىمدارىنا قاتىستى جاعداي جويىلادى. ەندى مۇنىمەن «وتباسى بانك اينالىساتىن بولعاندىقتان بىرىنشىدەن باسپانا اشىق، ەكىنشىدەن ءادىل بولىنەدى. بارلىق جۇمىس ءبىرىڭعاي اقپاراتتىق جۇيە ارقىلى جۇرگىزىلەدى. بۇل دا ازاماتتارعا ىڭعايلى، - دەدى ول ورتالىق كوممۋنيكاتسيالار قىزمەتىندەگى بريفينگىدە ب ا ق وكىلدەرىنىڭ ساۋالىنا وراي.

باقىتجان جۇنىسبەكوۆتىڭ ايتۋىنشا، ازاماتتاردى باسپانا كەزەگىنە قويۋ قىزمەتىنىڭ بانككە ءوتۋى تۇرعىن ءۇي الۋدى جەدەلدەتپەيدى. ويتكەنى، قارجى ينستيتۋتى باسپانانى بولۋمەن عانا اينالىسادى. ال باسپانا كەزەگىنىڭ تەزىرەك جىلجۋى ەڭ الدىمەن قۇرىلىس كولەمىنە بايلانىستى.

- ەلىمىزدە الەۋمەتتىك تە، نارىقتىقتىق تا تۇرعىن ءۇي قۇرىلىسىن ىنتالاندىرۋ شارالارى جۇمىس ىستەپ تۇر. بيۋجەتتىڭ مۇمكىندىگىنە قاراي الەۋمەتتىك تۇرعىن ءۇي قۇرىلىسىن قولداي بەرەمىز. كەيىنگى جىلدارى تۇراقتى ءوسىم بايقالادى، - دەدى كوميتەت باسشىسى.

سونداي-اق ول مەملەكەت كوممەرتسيالىق قۇرىلىستى دامىتۋ ءۇشىن جاعداي جاساپ وتىرعانىنا نازار اۋدارتتى.

- بەلگىلى ءبىر شارتتار، سىياقى مولشەرلەمەسىن سۋبسيديالاۋ كەزىندە ينفراقۇرىلىم جۇرگىزۋ سياقتى ىنتالاندىرۋ تەتىكتەرى بار. بۇل شارالاردى قۇرىلىسشىلار بەلسەندى قولدانادى. سوندىقتان قۇرىلىس مۇنان ارى قارقىن الىپ، ال كەزەك جىلدام قوزعالادى دەپ ويلايمىن، - دەدى كوميتەت باسشىسى.

بۇعان دەيىن باسپاناعا مۇقتاج جاندارعا قانداي مەملەكەتتىك كومەك كورسەتىلەتىنىن جازعان ەدىك.