مەنىڭ ميسسيام ۇلتتىق ستيلدەگى دۇنيەلەردى ساتۋ ەمەس، ەتنو-ديزايندى جاڭعىرتۋ - ايدانا ەرىمبەت
استانا. KAZINFORM - ايدانا ەرىمبەت - تۇركىستان وبلىسىنىڭ تۋماسى. كوپبالالى وتباسىنان شىققان.
ول - ۇلتتىق ونەردى دامىتىپ، ناسيحاتتاپ جۇرگەن ەتنو-ديزاينەر. قازاقستاندىق ديزاينەردىڭ قولىنان شىققان ۇلتتىق ستيلدەگى قولونەر بۇيىمدارى Dubai Design Week كە كورمەسىنە قويىلعان. جەرلەسىمىزدىڭ ونەرىنە شەتەلدەن قىزىعۋشىلىق تانىتقاندار بار، اتاپ ايتقاندا، قاتار ەلىنەن سۇرانىس تۇسكەن.
«اكەمنىڭ مەملەكەتتىك قىزمەتىنە بايلانىستى ەلىمىزدىڭ ءبىرقاتار قالاسىندا تۇردىق. قازىر استانانىڭ تۇرعىنىمىن. وقۋشى كەزىمدە ورتا مەكتەپ پەن كوركەمونەر مەكتەبىندە وقىدىم. 9-سىنىپتان كەيىن اكەمنىڭ كەڭەسىمەن استاناداعى پوليتەحنيكالىق كوللەدجدىڭ ينتەرەر- ديزاين ماماندىعىنا ءتۇستىم. اكەم شىعارماشىلىعىڭمەن قاتار باسقا دا تالانتىڭدى اشاسىڭ دەگەن- تۇعىن. كوللەدج بىتىرگەن سوڭ مەندە ەكى تاڭداۋ تۇردى، ءبىرى - «شابىت» ونەر ۋنيۆەرسيتەتىنە ءتۇسۋ، ەكىنشى تاڭداۋ - جۇمىس ىستەپ، الىستان ارحيتەكتۋرا ماماندىعىن مەڭگەرۋ. كوللەدجدەن كەيىن ەلوردادا ستۋديادا جۇمىس ىستەدىم، تاجىريبە جيناي كەلە، ءوزىمنىڭ ستۋديام بولعانىن قالادىم»، - دەدى ايدانا ەرىمبەت.
ايدانا سۋرەت، ديزاين سالاسىنا بالا كۇنىنەن قىزىققان.
«ونىڭ ىشىندە ەتنو-ديزاين بالا كەزىمنەن تانىس دۇنيە. 7-سىنىپقا دەيىن قازاق بيىمەن اينالىستىم، ودان بولەك، قازاق اندەرى مەن كۇي تىڭداپ وسكەم. سوندىقتان ۇلتتىق ونەر بويىما بالا كۇنىمنەن سىڭگەن. كوللەدجدە وقىپ جۇرگەندە كۋرستىق، ديپلومدىق جۇمىستارىم قازاقى ناقىشتاعى ينتەرەرمەن بايلانىستى بولدى. جۇمىس ىستەي باستاعاندا دا قازاقي جوبالاردى، سەنىڭ جۇرەگىڭە جاقىن عوي دەپ ماعان تاپسىراتىن. ۋاقىت وتە كەلە ەتنو-ينتەرەر ديزاين سالاسىندا تانىلا باستاپ، ءوز كاسىبىمدى جۇرگىزۋدى قولعا الدىم. ويۋ- ورنەك، شاڭىراق، جىلقى، سول سەكىلدى ۇلتتىق ناقىشتاردى ءسان، ينتەرەر، گرافيكالىق باسقا دا سالادا قولدانۋعا بولادى. ءبىراق، بۇل جەڭىل اسسوتسياتسيا، مەنىڭ ماقساتىم -ۇلتتىق ناقىشتاردى، سالت-ءداستۇردى، تاريحتى، مادەنيەت پەن ونەردى زەرتتەۋ ارقىلى تەرەڭىرەك قولدانۋ. ياعني، ماعىنالى جوبالاردى جۇزەگە اسىرۋ. ودان بولەك، ۇلتتىق ءستيلدى وتكەن تاريحپەن، ادامنىڭ شىققان تەگى، اتادان بالاعا كەلە جاتقان مۇرا، بۇيىم، زاتتارمەن بايلانىستىرۋعا دا بولادى»، - دەيدى ول.
ونىڭ ايتۋىنشا، ەتنو-ينتەرەر، ديزاين سالاسىندا كونەدەن قالعان كيىز ءۇي، بالبالتاستار مەن پەتروگليفتەردى ورىندى قولدانۋ ارقىلى قازاق ونەرىن دامىتىپ، ناسيحاتتاۋعا بولادى.
«ماعان قوناقۇيدىڭ VIP نومىرلەرىنىڭ ينتەرەرىن دايىنداۋ بۇيىردى، ول جەردە دە ۇلتتىق ءستيلدى قولدانۋعا بولادى. مىسالى، تاريحقا جۇگىنسەك، قازاقتىڭ حان، سۇلتاندارى مەن باي- قۋاتتى ادامدارى ادەمى كيىز ۇيدە، ەرەكشە ستيلدەگى كيىمدەر كيىپ، قولونەر بۇيىمدارىن قولدانعان. قوناق ءۇيدىڭ VIP نومىرلەرىندەگى كەرۋەتتىڭ جوعارى جاعىن حاننىڭ تاعى سەكىلدى ديزايندا جاساپ، كەرەمەت ءبىر دۇنيە شىعاردىم. ودان بولەك، ۇلتتىق ناقىشتار مەن ءستيلدى قوعامدىق ورىنداردا دا ءساتتى پايدالانۋعا بولادى. قازىرگى تاڭدا ەتنو-ديزاين دامىپ كەلە جاتىر، سوندىقتان ءار دۇنيەنىڭ ەرەكشە، قايتالانباس بولعانى ابزال»، - دەيدى ديزاينەر.
سونداي- اق اتالعان مامان ەتنو ديزاينداعى بۇيىم، زاتتاردىڭ سۇرانىسقا يە بولىپ كەلە جاتقانىن ايتتى.
«اسىرەسە، تۇرمىس زاتتارى، ياعني، جيھاز، ۇستەل، ورىندىقتار، ىدىس-اياق، شامدار تاعى باسقا. تاعى ءبىر بايقاعانىم، قازىر ءار وتباسى ۇيىندە قازاقي ستيلدە ءبىر دۇنيەنىڭ بولعانىن قالايدى. ءبىراق، بۇنى ترەند دەپ ايتا المايمىن، دەگەنمەن ءۇردىس بار. ۇلتتىق ونەر ارقىلى ەتنو-ديزاينى تانىتۋ، دامىتۋ وزىمىزدەن باستالادى»، - دەيدى ا. ەرىمبەت.
ودان بولەك، ەتنو-ديزاينەر ۇلتتىق ستيلدەگى بۇيىمدار نەگە قىمبات دەگەن پىكىرگە قاتىستى ويىمەن ءبولىستى.
«ۇلتتىق بۇيىمدار قۇندى بولۋى كەرەك دەپ ويلايمىن. ونىڭ ۇستىنە قازىر ۇلتتىق ستيلدە دەگەن اتاۋمەن ماسس- ماركەت قاپتاپ كەتتى. كەيدە ءتىپتى بۇيىم، زاتتاردىڭ ءبىر- بىرىنەن ايىرماشىلىعى جوق. ال ەتنو- ديزايندى راسىمەن دامىتامىز دەسەك، ول ەرەن ەڭبەك پەن ىزدەنىستى قاجەت ەتەدى. مەنىڭ ميسسيام - ۇلتتىق ستيلدەگى زاتتار مەن باسقا دا دۇنيەلەردى جاساپ، ساتىپ، تابىس تابۋ عانا ەمەس، ۇمىتىلىپ بارا جاتقان قولونەر تۇرلەرىن، ەتنو-ديزايندى ساقتاپ، قايتا جاڭعىرتۋ. ءبىز ۇلتتىق ناقىشتاعى زاتتار مەن بۇيىمداردى كونەدەن كەلە جاتقان تەحنولوگياعا سۇيەنە وتىرىپ جاسايمىز. ول شەبەرلىك پەن ۋاقىتتى تالاپ ەتەدى. تاعى ءبىر جايت، ءبىزدىڭ ەتنو- ديزايندا جاساپ شىعاراتىن دۇنيەلەر شەكتەۋلى كولەمدە. سونداي-اق ۇلتتىق ناقىشتاعى بۇيىمداردى جاساۋعا مەملەكەتتىڭ، ينۆەستورلاردىڭ قولداۋىنسىز ءوز قاراجاتىمىزدى جۇمسايمىز»، - دەيدى ول.
اۆتور
داۋلەت ىزتىلەۋ