مەنىڭ ەكى اكەم بولدى - مەيرامبەك بەسپايەۆ

استانا. KAZINFORM - تانىمال ءانشى مەيرامبەك بەسپايەۆ «سالەم، پاپا» جوباسىندا اتا-اناسى جايلى ايتتى.

ءانشى بالا كەزىندە اتا-اجەسىنىڭ تاربيەسىندە بولعانىن ايتتى.

«بالالىق شاعىم جامبىل وبلىسىنىڭ تالاس اۋدانىندا ءوتتى. ول كەزدە زامان سونداي ما، اتا-اجەنىڭ بالاسى بولدىق. اكە-شەشەم جاس. ولار قالادا تۇردى. مەن اتا-اپامنىڭ قولىندا اۋىلدا تۇردىم. اكەم ماعان اعا سەكىلدى كورىنەتىن. اكە-شەشەمنىڭ سولار ەكەنىن ەستىگەندە قاتتى تاڭعالدىم. وعان دەيىن مەن اتا-اپامنىڭ بالاسىمىن دەپ ءوسىتىم عوي. مەكتەپكە باراتىن كەزدە اكەم اتامنان جالىنىپ سۇراپ العان. «قالانىڭ ءومىرىن كورسىن، مەكتەپكە بارادى» دەگەن سوڭ، اتام رۇقساتىن بەردى. بالالىق شاقتا ەكى اكەنىڭ تاربيەسىن كوردىم دەپ ايتا الامىن»، - دەيدى ءانشى.

ءانشى ونەرگە كەلە باستاعاندا التىنبەك قورازبايەۆ اكەسىندەي قامقورلىق جاساعانىن دا ايتا كەتتى.

«ودان كەيىن قالادا 12-13 جاستا بولۋىم كەرەك. ونەرگە ارالاسا باستادىم. ونەردەگى اكەم - التىنبەك قورازبايەۆ. ول كىسى دە اكەمدەي قامقورلىق جاسادى. قۇدايعا شۇكىر، مەنىڭ اكەلەرىم كوپ بولدى»، - دەيدى مەيرامبەك بەسپايەۆ.

ءانشى اتا-اناسى جايلى ءسوز قوزعادى.

«اكەم اقكوڭىل كىسى. ورتاسىن جادىراتىپ، كۇلدىرىپ وتىراتىن. شەشەم - سالماقتى، كوپ سويلەمەيتىن ادام. ماعان ەكەۋىنىڭ دە قاسيەتى قانمەن بەرىلدى دەپ ويلايمىن. سالماقتىلىعىم دا، ءازىل ايتىپ كۇلدىرىپ وتىراتىنىم دا بار. اكەمنەن شاپالاق العان ادام ەمەسپىن. ونىڭ قاس-قاباعىنا قاراپ-اق تۇسىنە بەرەتىنبىز.

اكەنىڭ ءرولىن سوزبەن ايتىپ جەتكىزە المايمىن. ونى ءوزىمىز اكە بولعاندى جاقسى ءتۇسىنىپ جاتىرمىز. اكەنىڭ قادىرىن بالالى بولعاندا بىلەسىڭ. بالاعا اكەنىڭ وسيەتى مەن بەرگەن ءتالىمى وتە ماڭىزدى. قازاق اكەنى اسقار تاۋعا تەڭەيدى. بۇگىندە بالالارىما جاقسى اكە بولۋعا تىرىسامىن. مەن بالا كۇنىمدە «بوزتورعاي» دەگەن ءاندى ايتقانمىن. جەتىم بالانىڭ زارى مەن مۇڭىن سۋرەتتەيدى. سول كەزدە التىنبەك كوكەم جەتىمدەر ۇيىنە الىپ بارعان. ءاندى ءتۇسىنىپ ايتسىن دەگەن نيەتى بولۋى كەرەك. «مىنا بالالاردىڭ اكەسى دە، شەشەسى دە جوق» دەگەندە، «ومىردە اكە-شەشەسى جوق بالالار دا بولادى ەكەن عوي» دەپ قاتتى تاڭعالعانىم بار»، - دەيدى ونەر يەسى.

Massaget.kz