مۇناي باعاسى قۇلدىرادى، دوللار ۇشتى: ۇلتتىق بانك ۆاليۋتا نارىعى تۋرالى اقپارات تاراتتى

استانا. قازاقپارات – 7-ساۋىردەگى جاعداي بويىنشا ءبىر اپتا ىشىندە (31-ناۋرىز بەن 7-ءساۋىر ارالىعىندا) 14,1 پايىزعا تومەندەپ، باررەلىنە $65 تەن تومەن ءتۇستى. ۆاليۋتا يندەكسى ءبىر اپتا ىشىندە 1,8 پايىزعا السىرەدى. وسى جاعدايعا بايلانىستى ۇلتتىق بانك ۆاليۋتا نارىعى نەگە قۇبىلىپ تۇرعانىن تۇسىندىرۋگە تىرىستى.

- ا ق ش پرەزيدەنتى اكىمشىلىگىنىڭ ءبىرقاتار ساياسي شەشىمىنە بايلانىستى جاھاندىق قارجى نارىقتارىندا قۇبىلمالىلىق كۇشەيگەنى بايقالادى. ساۋدا شيەلەنىسى مەن پروتەكتسيونيستىك ريتوريكا كۇشەيە بەرسە، جاھاندىق رەتسەسسيا باستالۋى مۇمكىن دەگەن نارىق قاتىسۋشىلارىنىڭ الاڭداۋشىلىعى دا ارتا ءتۇستى، - دەلىنگەن حابارلامادا.

نارىقتار تاۋەكەل ەتۋگە دەگەن قۇلشىنىستى كۇرت سەيىلتىپ، تاۋەكەلدى اكتيۆتەردى قۇنسىزداندىرۋ ارقىلى وسى جاعدايعا رەاكتسيا ءبىلدىرىپ جاتىر. ا ق ش- تاعى نەگىزگى قور يندەكستەرىنىڭ ديناميكاسى قازىر تەرىس ايماقتا تۇر. سونىمەن قاتار، مۇناي باعاسى دا ايتارلىقتاي ارزاندادى.

- «قارا التىننىڭ» باعاسى 2025-جىلعى 7-ساۋىردەگى جاعداي بويىنشا ءبىر اپتا ىشىندە (31-ناۋرىز بەن 7-ءساۋىر ارالىعىندا) 14,1 پايىزعا تومەندەپ، باررەلىنە $65 تەن تومەن ءتۇستى. بۇل - كەيىنگى ءتورت جىلداعى ەڭ تومەنگى كورسەتكىش. مۇناي وندىرىسىنە قويىلعان شەكتەۋلەردى تەز ارادا الىپ تاستاۋعا قاتىستى وپەك+ ۇيىمىنىڭ بۇعان دەيىن قابىلداعان شەشىمى جانە ازيا ەلدەرىنە بارلىق مۇناي ماركاسىنىڭ ءبىر باررەلىن $2,3 كە تومەندەتەتىنى تۋرالى ساۋد ارابياسىنىڭ مالىمدەمەسى مۇناي باعاسىنا قوسىمشا قىسىم ءتۇسىردى. وسىلايشا، باعا 2022-جىلعى قازاننان بەرى ايتارلىقتاي تومەندەدى، - دەپ جازدى ۇلتتىق بانك.

ءمالىم بولعانداي، مۇناي باعاسىنىڭ قۇلدىراۋى مەن الەمدەگى بەلگىسىزدىكتىڭ كۇشەيۋىنە بايلانىستى دامۋشى نارىقتار (ە م) مەن شيكىزاتقا نەگىزدەلگەن ەكونوميكالاردىڭ ۆاليۋتاسى السىرەپ جاتىر. وسىلايشا، ە م ەلدەرىنىڭ ۆاليۋتا يندەكسى ءبىر اپتا ىشىندە 1,8 پايىزعا السىرەدى (2025-جىلعى 31-ناۋرىز بەن 7-ءساۋىر ارالىعىندا). وڭتۇستىك افريكا راندى 7,3 پايىزعا، رەسەي رۋبلى 3,8 پايىزعا، برازيليا رەالى 3,5 پايىزعا، يندونەزيا رۋپياسى 1,5 پايىزعا، ال مەكسيكا پەسوسى 1,1 پايىزعا ارزاندادى.

- جاھاندىق نارىقتارداعى قۇبىلمالىلىقتىڭ ارتۋى مەن نەگىزگى ەكسپورت تاۋارلارى باعاسىنىڭ تەرىس ديناميكا بەرۋىنەن 7-ءساۋىر كۇنى KASE ساۋداسىندا تەڭگەنىڭ بيرجاداعى باعامى 1 ا ق ش دوللارىنا 519,12 تەڭگەنى قۇراپ، الدىڭعى ساۋدا كۇنىنەن بەرى 2,7 پايىزعا السىرەدى (ءبىر اپتا ىشىندەگى السىرەۋ كورسەتكىشى — 2,9 پايىز). ۇلتتىق ۆاليۋتاعا سىرتقى فاكتورلار، سونىڭ ىشىندە الەم بويىنشا تاۋەكەل-سەنتيمەنتتىڭ ناشارلاۋىنا بايلانىستى بەيرەزيدەنتتەردىڭ شەتەل ۆاليۋتاسىنا دەگەن سۇرانىسى ارتقانى ىقپال ەتىپ وتىر، - دەپ ءتۇسىندىردى بانكتەن.

سۇرانىستىڭ ءوسۋى ساۋدا كولەمىنىڭ ۇلعايۋىنا دا اسەر ەتتى: 7-ءساۋىردىڭ قورىتىندىسى بويىنشا KASE- دەگى وپەراتسيالار كولەمى 456,4 ميلليون ا ق ش دوللارىنا جەتتى. بۇل - جىل باسىنان بەرگى ءبىر كۇندەگى ورتاشا كولەمنەن شامامەن ەكى ەسە ارتىق.

- ۇلتتىق بانك بيۋجەت ترانسفەرتتەرى مەن اففيناجدالعان التىندى ساتىپ الۋعا بايلانىستى اقشا-كرەديت ساياساتىنىڭ بەيتاراپتىعىن ساقتاۋ ماقساتىندا شەتەل ۆاليۋتاسىن ساتۋ وپەراتسيالارى ارقىلى ۇلتتىق ۆاليۋتاعا قولداۋ كورسەتۋدى جالعاستىرۋدا. بۇل وپەراتسيالار بۇعان دەيىن جاريالانعان كولەمدە جۇزەگە اسىرىلىپ جاتىر، - دەلىنگەن بانك حابارلاماسىندا.

ۇلتتىق بانك ۆاليۋتا نارىعىنداعى جاعدايدى باقىلاۋدا ۇستاپ وتىرعانىن، سونداي-اق، قاجەت بولعان جاعدايدا، ايىرباس باعامىن تۇراقسىزداندىراتىن شامادان تىس قۇبىلمالىلىققا جول بەرمەۋ ءۇشىن قاجەت شارالاردى قابىلداۋعا دايىن ەكەنىن حابارلادى.

ايتا كەتەلىك، بۇگىن استانا مەن الماتى قالالارىنداعى اقشا ايىرباستاۋ پۋنكتتەرىندە دوللار 505-512 تەڭگەدەن ساۋدالانىپ جاتىر.