مۇناي ارزاندادى، تەڭگە السىرەدى - نارىق نە دەيدى

استانا. KAZINFORM - مۇناي باعاسى وپەك+ تاراپىنان ءوندىرۋ كولەمىنىڭ تاعى دا ۇلعايۋى كۇتىلگەندىكتەن 2,4 پايىزعا تومەندەدى. اليانس مۇشەلەرى ءوندىرۋ كولەمىن كەم دەگەندە تاۋلىگىنە 137 مىڭ باررەلگە ارتتىرۋدى ماقۇلداۋى مۇمكىن دەگەن جوعارى ىقتيمالدىق بار، دەپ جازدى قازاقستان قارجىگەرلەر قاۋىمداستىعى.

ۆاليۋتا نارىعى

دۇيسەنبى كۇنگى ساۋدا قورىتىندىسى بويىنشا USD/KZT جۇبىنىڭ ورتاشا ولشەنگەن باعامى 1 ا ق ش دوللارىنا 548,77 تەڭگەنى قۇرادى (4,32 تەڭگە)، ساۋدا كولەمى - 286,6 ميلليون دوللار (47,8 ميلليون). تەڭگەنىڭ السىرەۋى مۇناي باعاسىنىڭ ارزانداۋى اياسىندا، سونداي-اق اي سوڭىندا شەتەل ۆاليۋتاسىنا سۇرانىستىڭ ءداستۇرلى تۇردە ارتۋىمەن بايلانىستى بولدى. بۇل سۇرانىس يمپورتتىق كەلىسىمشارتتار بويىنشا تولەمدەر مەن سىرتقى قارىزدى وتەۋ بويىنشا مىندەتتەمەلەرىن ورىندايتىن قازاقستاندىق كومپانيالار تاراپىنان تۋىندايدى. ەسكە سالا كەتەيىك، تەڭگەنىڭ شامادان تىس السىرەۋى يمپورتتىق تاۋارلاردىڭ قىمباتتاۋىنا جانە تۇتىنۋ باعالارىنا ۆاليۋتا باعامىنىڭ اسەر ەتۋى ارقىلى ينفلياتسيانىڭ وسۋىنە اكەلۋى مۇمكىن.

بۇگىن باستى نازاردا - وندىرىستىك ادىسپەن ەسەپتەلەتىن ج ءى ءو، تولەم بالانسى، سىرتقى قارىز، حالىقارالىق ينۆەستيتسيالىق پوزيتسيا، حالىقارالىق رەزەرۆتەر مەن ۇلتتىق قوردىڭ ۆاليۋتالىق اكتيۆتەرى جونىندەگى دەرەكتەردىڭ جاريالانۋى.

اقشا نارىعى

اقشا نارىعىنداعى كىرىستىلىك كورسەتكىشتەرى جۇيەدەگى وتىمدىلىك پروفيتسيتىنىڭ سالىستىرمالى تۇردە تۇراقتى دەڭگەيىندە تۇزەتىلدى. TONIA مولشەرلەمەسى 15,91 پايىزدان 15,74 پايىزعا دەيىن تومەندەدى، ال SWAP-1D كىرىستىلىگى 11,28 پايىزدان 11,02 پايىزعا دەيىن تومەندەدى. جالپى ساۋدا كولەمى 451,5 ميلليارد تەڭگەنى قۇرادى (2,6 ميلليارد). اشىق پوزيتسيا كولەمى شامامەن 5,3 تريلليون تەڭگە نارىق الدىنداعى بەرەشەككە تەڭ.

قور نارىعى

KASE يندەكسى اپتانى 0,3 پايىزعا وسىممەن باستاپ، 7166,4 تارماققا جەتتى. بۇل جاھاندىق قور نارىقتارىنداعى «بۇقالاردىڭ» باسىمدىعىمەن بايلانىستى. يندەكسكە قولداۋ كورسەتكەن - قازاتومپروم (1,5 پايىز) جانە KEGOC (0,9 پايىز) اكسيالارى. قالعان باعالى قاعازداردا ءالسىز وزگەرىستەر بايقالدى: 0,7 پايىزدان 0,4 پايىزعا دەيىن. مۇنداي نارىقتىق ديناميكا ينۆەستورلاردىڭ تۇراقتى اقشا اعىنى جانە ۆاليۋتالىق ەكسپورتتىق ءتۇسىمى بار كومپانيالارعا دەگەن قىزىعۋشىلىعىنىڭ ارتۋىن كورسەتەدى، بۇل - تەڭگەنىڭ السىرەۋى اياسىندا ورىندى ارەكەت.

مۇناي

مۇناي باعاسى 2,4 پايىزعا تومەندەپ، باررەلىنە 67,1 دوللار بولدى. بۇل وپەك+ ۇيىمى مۇناي ءوندىرۋ كولەمىن تاعى دا كوبەيتەدى دەگەن بولجامدارعا بايلانىستى. ەگەر ءوندىرۋ ارتسا، نارىقتا مۇناي تىم كوبەيىپ، باعاعا كەرى اسەر ەتۋى مۇمكىن. جەكسەنبىگە جوسپارلانعان كەزدەسۋدە وپەك+ ەلدەرى مۇناي ءوندىرۋدى تاۋلىگىنە كەمىندە 137 مىڭ باررەلگە كوبەيتۋ تۋرالى شەشىم قابىلداۋى مۇمكىن.

تاۋەكەل اكتيۆتەرى

ا ق ش- تىڭ قور يندەكستەرى 0,2-0,5 پايىزعا ءوستى، سەبەبى ينۆەستورلار ۇكىمەت جۇمىسىنىڭ توقتاپ قالۋ ىقتيمالدىعىن ەلەمەگەن ءتارىزدى. جاساندى ينتەللەكت (ج ي) چيپتەر سەگمەنتىنىڭ كوشباسشىسى Nvidia باعاسى ءوستى، ويتكەنى وتكەن اپتاداعى ج ي- گە قاتىستى سكەپتيتسيزم كەڭ نارىققا قىسىم جاساعان بولاتىن. كەيبىر ترەيدەرلەر ءتىپتى Nvidia مەن OpenAI اراسىنداعى ينفراقۇرىلىمدىق جوبانى ىسكە اسىرۋ ءۇشىن ەنەرگەتيكالىق رەسۋرستار جەتكىلىكتى مە دەپ كۇماندانعان. ساۋدا سەسسياسى ناتيجەسىندە Nvidia اكسيالارى شامامەن 2 پايىزعا ءوستى. ج ي سەكتورىنىڭ باسقا كومپانيالارى ءدا وسىم كورسەتتى: Advanced Micro Devices - 1 پايىزدان استام، Micron Technology - 4 پايىزدان جوعارى.

سونىمەن قاتار، ا ق ش فەدەرالدى ۇكىمەتىنىڭ 1-قازانداعى قارجىلاندىرۋ مەرزىمى اياقتالۋىنا بايلانىستى جۇمىسىنىڭ ۋاقىتشا توقتاپ قالۋ قاۋپى ساقتالىپ وتىر. مۇنداي جاعدايلار ادەتتە نارىقتارعا ايتارلىقتاي اسەر ەتپەيدى، ءبىراق بۇل جولى جاعداي باسقاشا بولۋى مۇمكىن. ينۆەستورلار ەڭبەك نارىعىنىڭ باياۋلاۋى، ستاگفلياتسيا قاۋپى جانە اكسيالاردىڭ جوعارى باعالانۋى سالدارىنان ساقتىق تانىتا باستادى. بۇعان قوسا، ۇكىمەت جۇمىسىنىڭ توقتاۋى Moody’s اگەنتتىگى مامىردا تومەندەتكەن ا ق ش- تىڭ كرەديتتىك رەيتينگىنە تاعى ءبىر رەت اسەر ەتۋى مۇمكىن.

قورعانىس اكتيۆتەرى

ا ق ش ۇكىمەتىنىڭ جۇمىسى توقتاپ قالۋى مۇمكىن دەگەن الاڭداۋشىلىق اياسىندا تاۋەكەلى تومەن اكتيۆتەرگە سۇرانىس ارتىپ وتىر. التىن باعاسى 1,7 پايىزعا ءوسىپ، ءبىر ۋنتسياسى 3861 دوللارعا جەتتى. 10 جىلدىق قازىناشىلىق وبليگاتسيالار كىرىستىلىگى 4,19 پايىزدان 4,14 پايىزعا تومەندەدى. ال دوللار يندەكسى 0,3 پايىزعا تومەندەپ، 97,9 تارماق دەڭگەيىندە ورنىقتى.

ەسكە سالا كەتەيىك، بۇعان دەيىن قازاقستان رەسپۋبليكاسى ۇلتتىق بانكىنىڭ اقشا-كرەديت ساياساتى كوميتەتى بازالىق مولشەرلەمەنى 16,5 پايىز دەڭگەيىندە ساقتاۋ تۋرالى شەشىم قابىلداعانىن جازعان ەدىك.