مەملەكەتتىك تۇرعىن ءۇي قورىنان باسپانا بەرۋ قاعيدالارى بەكىتىلدى

استانا. KAZINFORM - ونەركاسىپ جانە قۇرىلىس ءمينيسترى مەملەكەتتىك تۇرعىن ءۇي قورىنان تۇرعىن ءۇي بەرۋ قاعيدالارىنىڭ جاڭا رەداكسياسىن بەكىتتى.

2025-جىلعى 31-ناۋرىزداعى بۇيرىققا سايكەس:

- مەملەكەتتىك مەكەمەلەر مەن مەملەكەتتىك كاسىپورىنداردىڭ تۇرعىن ءۇي قورىنان باسپاناعا مۇقتاج رەتىندە ەسەپكە سول ەلدى مەكەندە تۇراتىن وسى مەكەمەلەر مەن كاسىپورىنداردىڭ قىزمەتكەرلەرى قويىلادى، - دەلىنگەن قۇجاتتا.

ەگەر مەملەكەتتىك مەكەمەلەر مەن كاسىپورىنداردىڭ تۇرعىن ءۇي قورىندا بوس ءۇي بولسا، ءوتىنىش بەرگەن ادامدارعا باسپانا الۋ قۇقىعى بەرىلەدى.

ەسەپكە قويۋ ءۇشىن ۋاكىلەتتى ورگانعا كەلەسى قۇجاتتار قاجەت:

- ءوتىنىش؛

- ءوتىنىش بەرۋشى مەن ونىڭ وتباسى مۇشەلەرىنىڭ جەكە باسىن كۋالاندىراتىن قۇجاتتارىنىڭ كوشىرمەلەرى؛

- نەكەگە تۇرۋ (بۇزۋ)، وتباسى مۇشەلەرىنىڭ قايتىس بولۋى، بالالاردىڭ تۋۋى تۋرالى كۋالىكتەردىڭ كوشىرمەلەرى؛

- ءوتىنىش بەرۋشىنىڭ وتباسىنا وزگە تۇلعالاردى قوسۋ تۋرالى سوت شەشىمى (بار بولسا)؛

- ءوتىنىش بەرۋشىنىڭ (نەمەسە وتباسىنىڭ) الەۋمەتتىك وسال توپتارعا جاتاتىنىن راستايتىن قۇجات.

ۋاكىلەتتى ورگان ءوتىنىش بەرۋشى مەن ونىڭ وتباسى مۇشەلەرىنىڭ مەنشىگىندە تۇرعىن ءۇيدىڭ بار-جوعى تۋرالى اقپاراتتى مەملەكەتتىك اقپاراتتىق جۇيەلەر ارقىلى الادى. وتباسى مۇشەلەرىنىڭ مەكەنجايى تۋرالى مالىمەت تە سول جۇيە ارقىلى انىقتالادى. وسىلايشا ءوتىنىش بەرۋ كەزىندە اقپاراتتىق جۇيەلەردەن الۋعا بولاتىن قۇجاتتار مەن مالىمەتتەر تالاپ ەتىلمەيدى.

قۇجاتتار قارالعاننان كەيىن، ءوتىنىش بەرىلگەن كۇننەن باستاپ 5 جۇمىس كۇنىنەن كەشىكتىرىلمەي، ۋاكىلەتتى ورگان كەلەسى ەكى شەشىمنىڭ ءبىرىن قابىلدايدى:

- ەسەپكە قويۋ تۋرالى، كەزەك ءنومىرىن كورسەتە وتىرىپ، حابارلاما جىبەرەدى؛

- نەگىزدەلگەن جازباشا باس تارتۋ جىبەرەدى.

مەملەكەتتىك تۇرعىن ءۇي قورىنان باسپانا بەرۋ تۋرالى شەشىم تۇرعىن ءۇي كوميسسياسىنىڭ قورىتىندىسى نەگىزىندە قابىلدانادى. ەگەر كوميسسيا تۇرعىن ءۇي بەرۋدى ماقۇلداسا، وندا 15 كۇن ىشىندە ءوتىنىش بەرۋشىمەن مەملەكەتتىك مەكەمە نەمەسە كاسىپورىن اراسىندا تۇرعىن ءۇيدى جالعا الۋ تۋرالى شارت جاسالادى.

- شارت ءۇش دانا ەتىپ راسىمدەلەدى، ءبىر داناسى ۋاكىلەتتى ورگاندا ساقتالادى، ەكىنشىسى مەملەكەتتىك مۇلىك تىزىلىمىنە تىركەۋ ءۇشىن جەرگىلىكتى اتقارۋشى ورگانعا تاپسىرىلادى جانە ءۇشىنشىسى بەرۋشىگە بەرىلەدى جانە قونىستانۋ قۇقىعىن راستايتىن جالعىز قۇجات، - دەلىنگەن بۇيرىق ماتىنىندە.

جالعا الۋشىلار (قوسىمشا جالعا الۋشىلار) e-qazyna.kz ۆەب-پورتالى ارقىلى ءوز شارتتارى، ەسەپتەۋلەر، بيۋجەتكە تولەمدەر جانە ايىپپۇلدار تۋرالى اقپاراتتى كورە الادى.

بۇيرىق 2025-جىلعى 24-مامىردان باستاپ كۇشىنە ەنەدى.

ايتا كەتسەك، بيىل ەلىمىزدە رەكوردتىق كولەمدە تۇرعىن ءۇي پايدالانۋعا بەرىلەدى. بۇل تۋرالى پرەمەر-ءمينيستردىڭ ورىنباسارى سەرىك جۇمانعارين ۇكىمەت وتىرىسىندا مالىمدەگەن ەدى.