مەملەكەتتىك تۋدى قورلاعان تۇركىستان وبلىسىنىڭ تۇرعىنى سوتتالدى

تۇركىستان. KAZINFORM - تۇركىستان قالالىق سوتىندا مەملەكەتتىك تۋدى قورلاپ، الەۋمەتتىك جەلىگە سالعان ساۋران اۋدانىنىڭ تۇرعىنىنا قاتىستى قىلمىستىق ءىس قارالدى.

سوتتالۋشى ساۋران اۋدانى، يباتا اۋىلىنداعى ورتالىق كوشەگە ىلىنگەن مەملەكەتتىك تۋدى سۋرەتكە ءتۇسىرىپ، جەلىگە جۇكتەگەن. سودان استىنا مەملەكەتتىك تۋدى قورلايتىن سوزدەر جازعان.

الايدا جاريالانعان پوستقا وقىرمانداردىڭ نارازى پىكىرى كوبەيىپ كەتكەندىكتەن، سالعان جازباسىن ءوشىرىپ تاستاعان. قىلمىستىق ارەكەتتەر ءىس ماتەريالدارىنا تىركەلگەن قۇجاتتارمەن تولىق دالەلىن تاپتى.

سوت ۇكىمىمەن سوتتالۋشى ق ك- ءنىڭ 372-بابىندا كوزدەلگەن قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىلدى. وعان 1 جىل مەرزىمگە باس بوستاندىعىن شەكتەۋ جازاسى تاعايىندالدى.

«سوتتالۋشىعا قولدانىلعان «كۇزەتپەن ۇستاۋ» تۇرىندەگى بۇلتارتپاۋ شاراسى «ەشقايدا كەتپەۋ جانە ءتيىستى مىنەز- قۇلقىن ۇستاۋ تۋرالى» قولحاتىنا وزگەرتىلىپ، ول سوت زالىنان قاماۋدان بوساتىلدى. سوت ۇكىمى زاڭدى كۇشىنە ەنگەن جوق» - دەلىنگەن تۇركىستان وبلىستىق سوتىنىڭ باسپا ءسوز قىزمەتى ۇسىنعان اقپاراتتا.

اۆتور

قايرات زاينيشيەۆ