مەملەكەتتىك تۋدى قورلاعان اتىراۋلىقتىڭ ءبىرى 15 تاۋلىككە قاماۋعا الىندى
اتىراۋ. KAZINFORM - اتىراۋ قالاسىنداعى اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىندا وزگە تىلدە جازۋى بار مەملەكەتتىك تۋمەن فوتوعا تۇسكەن ءۇش ادامنىڭ ءىسى قارالدى.
سوت ماتەريالىندا كورسەتىلگەندەي، 3 ادامعا ق ر اكىمشىلىك قۇقىق بۇزۋشىلىق تۋرالى كودەكسىنىڭ 434-بابىنىڭ 1-بولىگىمەن (ۇساق بۇزاقىلىق) ايىپ تاعىلعان. ونىڭ ءبىرى - جاس ءوسپىرىم.
- 2025 -جىلعى 23- ناۋرىزدا ازاماتشالار ن. , ا. جانە كامەلەت جاسىنا تولماعان ح. اتىراۋ قالاسىنداعى مۇز ايدىنى عيماراتىندا اراب تىلىندەگى جازۋى بار قازاقستان رەسپۋبليكاسىنىڭ تۋىمەن سۋرەتكە تۇسكەن. سۋرەتتى الەۋمەتتىك جەلى ارقىلى تاراتىپ، ۇساق بۇزاقىلىق جاساعان.
ولاردىڭ كىناسى اكىمشىلىك قۇقىق بۇزۋىشىلىق تۋرالى حاتتامامەن، فوتوسۋرەتپەن، باياناتپەن جانە باسقا دا ءىس ماتەريالدارىمەن تولىق دالەلدەندى، - دەپ حابارلادى اتالعان سوتتان.
سوت قاۋلىسىمەن قۇقىق بۇزۋشىلار ايىپ تاعىلعان باپپەن كىنالى دەپ تانىلدى.
- ن. -عا كامەلەتكە تولماعان ادامدى اكىمشىلىك قۇقىق بۇزۋشىلىققا تارتۋ، ادامدار توبىنىڭ اكىمشىلىك قۇقىق بۇزۋشىلىق جاساۋى سەكىلدى جاۋاپتىلىعىن اۋىرلاتاتىن ءمان-جاي ەسكەرىلىپ، 15 تاۋلىككە اكىمشىلىك قاماققا الۋ تۇرىندەگى اكىمشىلىك جازا قولدانىلدى. ا. -عا اكىمشىلىك جازا رەتىندە 78 مىڭ 640 تەڭگە، كامەلەتكە تولماعان ح. -نىڭ زاڭدى وكىلىنە 39 مىڭ 320 تەڭگە اكىمشىلىك ايىپپۇل سالىندى، - دەپ ءمالىم ەتتى سوتتان.
سوت قاۋلىلارى زاڭدى كۇشىنە ەنگەن جوق.
ەسكە سالا كەتەلىك، بۇدان بۇرىن اتىراۋدا وزگە تىلدە جازىلعان جازۋى بار مەملەكەتتىك تۋمەن فوتوعا تۇسكەندەر ۇستالعانىن حابارلاعان بولاتىنبىز.