مەملەكەتتىك سيفرلىق اكتيۆتەر قورى قۇرىلادى

استانا. KAZINFORM - بيىل مال شارۋاشىلىعىنداعى اگروبيزنەستى دامىتۋدىڭ كەشەندى جوسپارى قابىلدانادى. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ايتتى.

- سيفرلىق اكتيۆتەردىڭ تولىققاندى ەكوجۇيەسىن قالىپتاستىرۋدى جەدەلدەتۋ ءۇشىن ۇلتتىق بانكپەن بىرلەسىپ، مەملەكەتتىك سيفرلىق اكتيۆتەر قورىن قۇرۋ جوسپارلانۋدا. ىسكە اسىرىلىپ جاتقان باقىلاۋ جانە ونىڭ دەڭگەيىن تومەندەتۋ جونىندەگى شارالار كەشەنى ءوندىرىستى ۇلعايتۋ، باعا بەلگىلەۋدى مونيتورينگىلەۋ مەن باقىلاۋ، سونداي-اق باسقا دا رەتتەۋشى شارالار ارقىلى ينفلياتسيانى باسەڭدەتۋ ماقساتىندا قايتا قارالاتىن بولادى، - دەدى سەرىك جۇمانعارين.

ۆيتسە-پرەمەردىڭ اتاپ وتۋىنشە، ونەركاسىپتىك نەگىزدى نىعايتۋ ءۇشىن سيرەك كەزدەسەتىن جانە باسقا دا اسا تاپشى ماتەريالداردى وڭدەۋگە ارنالعان ونىمدەردى شىعارۋ باعىتىندا ءبىرقاتار جوبا ىسكە اسىرىلادى. گەولوگيالىق دەرەكتەردى سيفرلاندىرۋ جۇمىستارى جالعاسادى. قازىرگى ۋاقىتتا ولاردىڭ 60 پايىزى سيفرلاندىرىلعان. جۇمىستى تولىق اياقتاۋ 2026 -جىلدىڭ سوڭىنا قاراي جوسپارلانعان.

- سونىمەن قاتار گەولوگيالىق دەرەكتەردى تولىق قامتۋ ءۇشىن جاساندى ينتەللەكتتى قولدانۋ ارقىلى Big Data اقپاراتتىق جۇيەسىن قۇرۋ جۇمىستارى باستالدى. بۇدان باسقا كومىرسۋتەك شيكىزاتىن تەرەڭ وڭدەۋ بويىنشا فلاگماندىق جوبالار پۋلى قالىپتاستىرىلادى. اگروونەركاسىپتىك كەشەندى قولداۋ اياسىندا 1 تريلليون تەڭگەگە 5 ينۆەستيتسيالىق كەلىسىم جاسالدى.

سونداي-اق، «اگروونەركاسىپتىك كەشەندەگى ينۆەستيتسيالارعا تاپسىرىس» جوباسى ىسكە اسىرىلۋدا. ءۇش جىلدىق كەزەڭدە وسى باستاما اياسىندا جالپى سوماسى 1,2 تريلليون تەڭگەگە 200-دەن استام جوبا قارجىلاندىرىلاتىن بولادى، - دەدى ول.

سەرىك جۇمانعارين وسى جىلدىڭ سوڭىنا دەيىن مال شارۋاشىلىعىنداعى اگروبيزنەستى دامىتۋدىڭ كەشەندى جوسپارى قابىلداناتىندىعىن ايتادى.

- ونىڭ اياسىندا 5 پايىزدىق جەڭىلدەتىلگەن كرەديت بەرۋ باعىتىن جانە كرەديتتىك ونىمدەر جەلىسىن كەڭەيتۋ جوسپارلانعان. «دامۋ» قورى اگروبيزنەستىڭ قارىزدارىنا 80 پايىزعا دەيىن كەپىلدىك بەرەتىن بولادى. سونداي-اق، جاساندى ينتەللەكتىنى قولدانىلا وتىرىپ، جەر رەسۋرستارىنىڭ ءبىرىڭعاي سيفرلىق كارتاسى ازىرلەنەدى. اۋىل شارۋاشىلىعىن جۇرگىزۋ ماقساتىنداعى جەرلەردى بەرۋگە ارنالعان كونكۋرستار ەلەكتروندى تۇردە كوميسسيانىڭ قاتىسۋىنسىز وتكىزىلەدى، - دەدى ۆيتسە-پرەمەر.

بۇعان دەيىن ۇكىمەت جولداۋدى ىسكە اسىرۋ جوسپارىن قابىلداپ، جولداعى قاۋىپسىزدىك ماسەلەلەرىن پىسىقتايتىنىن جازعان ەدىك.

اۆتور

مارلان جيەمباي