مەملەكەتتىك رامىزدەرگە جاۋاپكەرشىلىك كۇشەيتىلمەك

استانا. KAZINFORM - «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭىنا جانە «اكىمشىلىك قۇقىق بۇزۋشىلىق تۋرالى» كودەكسىنە وزگەرىستەر مەن تولىقتىرۋلار ەنگىزىلمەك. بۇل تۋرالى مادەنيەت جانە اقپارات ۆيتسە-ءمينيسترى قانات ىسقاقوۆ ءمالىم ەتتى.

- بۇگىندە مينيسترلىك 2025-جىلعى 27-ناۋرىز كۇنى اتىراۋ وبلىسىندا قازاقستان رەسپۋبليكاسىنىڭ مەملەكەتتىك رامىزدەرىن، ونىڭ ىشىندە مەملەكەتتىك تۋدى قورلاۋ فاكتىسى بويىنشا اتىراۋ وبلىسىنىڭ ىشكى ىستەر دەپارتامەنتىمەن، ىشكى ساياسات باسقارماسىمەن بىرلەسىپ ءتۇسىندىرۋ جۇمىستارىن جۇرگىزىلدى. اتاپ ايتقاندا، ساۋدا ۇيلەرىندە، كينوتەاترلاردا، حالىق كوپ شوعىرلاناتىن جەرلەردە ارنايى بەينەروليكتەر ارقىلى اقپاراتتىق ناسيحاتتالىپ جاتىر، - دەپ جاۋاپ بەردى اگەنتتىك جولداعان رەسمي ساۋالعا قانات ىسقاقوۆ.

ودان بولەك، مينيسترلىك «Ozon.kz» ،«Wildberries.kz» ،«Temu.kz» حالىقارالىق ونلاين پلاتفورمالارىنا، «Kaspi.kz» «Halyk.kz» «Jusan.kz» «Freedom.kz» بانكى جانە باسقا دا قازاقستاندىق ينتەرنەت دۇكەندەرىنە رەسمي حات جولداپ، ءتۇسىندىرۋ جۇمىستارىن ۇيىمداستىرعان.

- سونىمەن قاتار، قولدانىستاعى «قازاقستان رەسپۋبليكاسىنىڭ مەملەكەتتىك رامىزدەرى تۋرالى» قازاقستان رەسپۋبليكاسىنىڭ 2007-جىلعى 4-ماۋسىمداعى  258-كونستيتۋتسيالىق زاڭىنا جانە «اكىمشىلىك قۇقىق بۇزۋشىلىق تۋرالى» قازاقستان رەسپۋبليكاسى كودەكسىنىڭ 458-بابىنا وزگەرىستەر مەن تولىقتىرۋلار ەنگىزۋ كوزدەلگەنىن مالىمدەيمىز، - دەيدى ول.

ەسكە سالساق، بيىل ناۋرىزدا اتىراۋدا وزگە تىلدە جازىلعان جازۋى بار مەملەكەتتىك تۋمەن فوتوعا تۇسكەندەر ۇستالدى. ارتىنشا، الەۋمەتتىك جەلىدە تارالعان فوتوعا بايلانىستى مەملەكەتتىك رامىزدەردى قورلاۋ بابىمەن قىلمىستىق ءىس قوزعالدى.

سونداي-اق مەملەكەتتىك تۋدى قورلاعان اتىراۋلىقتىڭ ءبىرى 15 تاۋلىككە قاماۋعا الىندى.

ايتا كەتەيىك، قۇقىق بۇزۋشىلاردىڭ 2 ەۋى كامەلەتكە تولماعان جاس ءوسپىرىم. سوت قاۋلىسىمەن كامەلەتكە تولماعان ا. -نىڭ زاڭدى وكىلىنە اكىمشىلىك جازا رەتىندە 39 مىڭ 320 تەڭگە اكىمشىلىك ايىپپۇل سالىندى.