مەملەكەتتىك قىزمەتتە مۇددەلەر قاقتىعىسىن انىقتاۋ تەتىگى ەنگىزىلەدى
استانا. KAZINFORM - جەمقورلىقپەن كۇرەس جونىندەگى زاڭ «مۇددەلەر قاقتىعىسى» اتتى جاڭا تاراۋمەن تولىقتىرىلىپ جاتىر.
بۇل تۋرالى ءماجىلىستىڭ جالپى وتىرىسىندا سىبايلاس جەمقورلىققا قارسى ءىس- قيمىل ماسەلەلەرى بويىنشا زاڭ جوباسىن تالقىلاۋ كەزىندە ق ر سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ءبىرىنشى ورىنباسارى ۇلان سارقۇلوۆ ءمالىم ەتتى.
- زاڭ جوباسى اياسىندا مەملەكەتتىك قىزمەتتە جانە كۆازيمەملەكەتتىك سەكتوردا مۇددەلەر قاقتىعىسىن انىقتاۋدى جانە رەتكە كەلتىرۋدى رەگلامەنتتەۋ قاراستىرىلعان. «سىبايلاس جەمقورلىققا قارسى ءىس- قيمىل تۋرالى» زاڭ «مۇددەلەر قاقتىعىسى» اتتى جاڭا تاراۋمەن تولىقتىرىلىپ جاتىر. وسى تاراۋدا مەملەكەتتىك قىزمەتشىلەر مەن ولاردىڭ باسشىلارىنىڭ مۇددەلەر قاقتىعىسى بولعان كەزدە، مىندەتتەرى كوزدەلگەن. ماسەلەن، مۇددەلەر قاقتىعىسى تۋرالى اقپاراتتى مەملەكەتتىك ورگانداردا ادەپ جونىندەگى ۋاكىلدەر، كۆازيمەملەكەتتىك ۇيىمداردا - سىبايلاس جەمقورلىققا قارسى كومپلاەنس- قىزمەتتەر، ال ولار بولماعان كەزدە كادر قىزمەتتەرى قارايتىن بولادى، - دەدى ۇ. سارقۇلوۆ.
حابارلامانى قاراۋ ناتيجەسمىندە ولار مەملەكەتتىك ورگاننىڭ جانە ۇيىمنىڭ باسشىلىعىنا مۇددەلەر قاقتىعىسىن بولۋ نەمەسە بولماۋى تۋرالى قورىتىندى ۇسىنادى. مۇددەلەر قاقتىعىسى بولعان كەزدە، مەملەكەتتىك ورگاننىڭ نەمەسە ۇيىمنىڭ باسشىلىعى ۇسىنىمداردى العان كۇننەن باستاپ 10 جۇمىس كۇنى ىشىندە مۇددەلەر قاقتىعىسىن بولعىزباۋ جانە رەتتەۋ بويىنشا شارالاردى قابىلداۋعا مىندەتتى. ونىڭ ىشىندە قىزمەتشىنى مۇددەلەر قاقتىعىسى تۋىنداعان بولىگىندە لاۋازىمدىق مىندەتتەرىن ورىنداۋدان شەتتەتۋگە، سونداي- اق ءوتىنىشتى، بۇيرىقتى جانە تاعى دا سول سياقتى قۇجاتتاردى قاراۋدى وزگە ادامعا تاپسىرۋى قاجەت.
- مەملەكەتتىك ورگاننىڭ نەمەسە ۇيىمنىڭ ءبىرىنشى باسشىسى وزىندە مۇددەلەر قاقتىعىسى تۋىنداعان ماسەلە بويىنشا وبەكتيۆتى شەشىم قابىلداۋ ءۇشىن وكىلەتتىكتەردى ءوزىنىڭ ورىنباسارىنا نەمەسە وزگە دە ۋاكىلەتتى ادامعا ۋاقتىلى بەرۋگە مىندەتتى. مۇددەلەر قاقتىعىسى جاعدايلارىن بولعىزباۋ جانە رەتتەۋ جونىندەگى شارالاردى قابىلداماعانى ءۇشىن، سونداي-اق مۇددەلەر قاقتىعىسى بولعان كەزدە لاۋازىمدىق وكىلەتتىكتەردى جۇزەگە اسىرعانى ءۇشىن اكىمشىلىك جاۋاپتىلىق كوزدەلگەن. مۇددەلەر قاقتىعىسى جاعدايىندا قابىلدانعان ءارى جاسالعان اكتىلەردىڭ، شارتتاردىڭ نەمەسە باسقا شەشىمدەردىڭ كۇشى جويىلۋى نەمەسە جارامسىز دەپ تانىلۋى مۇمكىن، - دەدى اگەنتتىك وكىلى.
ونىڭ سوزىنە قاراعاندا، جەكە مۇددەلەردى دەكلاراتسيالاۋ ەنگىزىلەدى. مەملەكەتتىك لاۋازىمعا نەمەسە وعان تەڭەستىرىلگەن لاۋازىمعا ورنالاساتىن ادام جۇمىس ورنى بويىنشا كادر قىزمەتىنە جەكە مۇددەلەرى تۋرالى دەكلاراتسيانى تاپسىرۋى كەرەك. مۇنداي دەكلاراتسيانى تولتىرۋ ءتارتىبى ۇكىمەت اكتىسىمەن ايقىندالادى.
بۇدان بۇرىن حابارلانعانداي، بۇل زاڭ جوباسى اياسىندا اۋىر جانە اسا اۋىر سىبايلاس جەمقورلىق قىلمىستار جاساعانى ءۇشىن سوتتالعانداردىڭ جاريا ءتىزىلىمى ەنگىزىلەدى.