مەملەكەتتىك قارىزىمىز 31,7 تريلليون تەڭگە - ءمادي تاكيەۆ

استانا. KAZINFORM - ەلىمىزدىڭ مەملەكەتتىك قارىزى 31,7 تريلليون تەڭگەنى قۇرايدى. بۇل تۋرالى قارجى ءمينيسترى ءمادي تاكيەۆ ايتتى.

- شىندىعىندا دا بيۋدجەت تاپشىلىعى 2,7 پايىزدى قۇرايدى. ەگەر تەڭگەگە شاقساق، وتكەن جىلى ول 3,7 تريلليون تەڭگە، ال بيىل 4,4 تريلليون تەڭگە بولدى. تاپشىلىقتىڭ تومەندەۋى ءبىزدىڭ سىرتقى نارىقتان از قارىز الاتىندىعىمىزدى بىلدىرەدى. ءبىزدىڭ ماقساتىمىز - مەملەكەتتىك قارىزدى قىسقارتۋ. دەگەنمەن، ونىڭ كولەمى ۇلكەن دە ەمەس. بۇگىندە 31,7 تريلليون تەڭگەنى قۇرايدى، - دەدى ءمادي تاكيەۆ پارلامەنت پالاتالارىنىڭ بىرلەسكەن وتىرىسىنان كەيىن ب ا ق وكىلدەرىنىڭ ساۋالىنا وراي.

بۇگىن پارلامەنت پالاتالارىنىڭ بىرلەسكەن وتىرىسىندا ۇكىمەت جانە جوعارى اۋديتورلىق پالاتانىڭ 2024 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرى بەكىتىلدى.

وتىرىس سوڭىندا پرەمەر-مينيستر ولجاس بەكتەنوۆ ۇكىمەت ءوز جۇمىسىندا مەملەكەت مۇددەلەرىن ءاردايىم ءبىرىنشى ورىنعا قوياتىنىن ايتتى.

- ۇكىمەت جۇمىسىندا جەتىستىكتەر دە، قاتەلىكتەر دە بولادى. ءومىر بولعاننان كەيىن قاتەلىكسىز بولمايدى. ءبىراق، ەڭ باستى ايتاتىنىم، ۇكىمەت ءوز جۇمىسىندا مەملەكەت مۇددەلەرىن ءاردايىم ءبىرىنشى ورىنعا قويادى. سوندىقتان الداعى ۋاقىتتا دا ورتاق جۇمىسىمىز جەمىستى بولسىن، - دەدى ولجاس بەكتەنوۆ.

اۆتور

مارلان جيەمباي