مەملەكەتتىك ماراپاتتار جۇيەسى 9 قۇرمەتتى اتاقپەن تولىقتىرىلادى - پرەزيدەنت
استانا. KAZINFORM - مەملەكەتتىك ماراپاتتار جۇيەسى 9 قۇرمەتتى اتاقپەن تولىقتىرىلادى. بۇل تۋرالى اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مەملەكەت باسشىسى قاسىم- جومارت توقايەۆ ايتتى.
«مەن جولداۋدا جۇمىسشى ماماندىق يەلەرىنە، ونەرتاپقىشتار مەن عالىمدارعا قۇرمەتتى اتاق بەرۋدى ۇسىندىم. مەملەكەتتىك ماراپاتتار جۇيەسىن 9 قۇرمەتتى اتاقپەن تولىقتىرۋ جوسپارلانىپ وتىر. سونىڭ ىشىندە «قازاقستاننىڭ اگرارلىق سالاسىنىڭ ەڭبەك سىڭىرگەن قايراتكەرى» اتاعى بار. بۇل - ەلىمىزدى وركەندەتۋگە ولشەۋسىز ۇلەس قوسقان اۋىل شارۋاشىلىعى ەڭبەككەرلەرىنە شىنايى قۇرمەتتىڭ بەلگىسى. قازىر دەپۋتاتتار ءتيىستى زاڭدارعا وزگەرىس ەنگىزۋ ماسەلەسىن قاراستىرىپ جاتىر»، - دەدى پرەزيدەنت.
مەملەكەت باسشىسى كەلەسى جىل - جۇمىسشى ماماندىقتارى جىلى ەكەندىگىنە نازار اۋدارتتى.
«جىل بويى ءبىز ناعىز ەڭبەك ادامدارىن جوعارى دەڭگەيدە ۇلىقتايتىن بولامىز. بۇل قوعامدا ەڭبەكقورلىق پەن كاسىبيلىك قۇندىلىقتارىن دارىپتەۋ جىلى بولماق»، - دەدى قاسىم-جومارت توقايەۆ.
اۆتور
مارلان جيەمباي