مەملەكەتتىك كەڭەسشى شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ وتىرىسىن وتكىزدى

استانا. KAZINFORM - مەملەكەتتىك كەڭەسشى ەرلان قاريننىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.

وتىرىستا 150 ازاماتقا «بولاشاق» حالىقارالىق ستيپەندياسىن بەرۋ تۋرالى شەشىم قابىلداندى. وسى شەشىمگە سايكەس 120 ستيپەنديانت ماگيستراتۋرادا، 6 ازامات دوكتورانتۋرادا وقيدى. ال 24 ستيپەنديات الەمنىڭ وزىق ۋنيۆەرسيتەتتەرى مەن ءوندىرىس ورتالىقتارىندا تاعىلىمدامادان وتەدى.

كوميسسيا مۇشەلەرى قازىر باسىمدىق بەرىلىپ وتىرعان ماماندىقتارعا ەرەكشە نازار اۋداردى. تيىسىنشە ستيپەندياتتاردىڭ ۇشتەن ەكىسىنەن استامى جاراتىلىستانۋ جانە تەحنيكالىق باعىتتار بويىنشا ءبىلىم الادى.

سونىمەن قاتار 33 ازامات الەمدەگى وزىق عىلىمي-زەرتتەۋ ورتالىقتارىندا عىلىمي تاعىلىمدامادان وتۋگە گرانت الدى. جيىن بارىسىندا ەرلان قارين عىلىمي تاعىلىمدامادان وتەتىن ۇمىتكەرلەردى مەملەكەت باسشىسىنىڭ بيىلعى 2-قىركۇيەكتە جاريالاعان جولداۋىنداعى ۇستانىمدارعا سايكەس مۇقيات ىرىكتەۋ قاجەتتىگىنە توقتالدى. سوندىقتان عىلىمي تاعىلىمداماعا مەملەكەت ءۇشىن اسا ماڭىزدى ءارى ەكونوميكادا جوعارى سۇرانىسقا يە ماماندار عانا جىبەرىلەدى.

جيىن سوڭىندا مەملەكەتتىك كەڭەسشى ەرلان قارين «بولاشاق» حالىقارالىق ستيپەندياسىن جانە عىلىمي تاعىلىمدامالار باعدارلاماسىن ىسكە اسىرۋ ۇدەرىستەرىن ودان ءارى جەتىلدىرۋ جونىندە ناقتى تاپسىرمالار بەردى. مۇنىڭ ءبارى ەلىمىزدىڭ عىلىمي الەۋەتىن دامىتۋ جولىندا ماڭىزدى ءرول اتقاراتىنىن اتاپ ءوتتى.