مەملەكەتتىك كەڭەسشى بالالاردىڭ قاۋىپسىزدىگىن قامتاماسىز ەتۋ ماسەلەسى جونىندە جيىن وتكىزدى

استانا. KAZINFORM - اقوردادا مەملەكەتتىك كەڭەسشى ەرلان قاريننىڭ توراعالىعىمەن بالالاردىڭ قاۋىپسىزدىگىن قامتاماسىز ەتۋ، جاس وسپىرىمدەرگە قاتىستى قۇقىقبۇزۋشىلىقتاردىڭ الدىن-الۋ جانە ونىڭ جولىن كەسۋ ماسەلەلەرىنە ارنالعان جيىن ءوتتى، دەپ حابارلايدى اقوردانىڭ باسپا ءسوز قىزمەتى.

باس قوسۋعا وقۋ-اعارتۋ، مادەنيەت جانە اقپارات مينيسترلەرى، باس پروكۋراتۋرا، ۇلتتىق قاۋىپسىزدىك كوميتەتى، ىشكى ىستەر مينيسترلىگى، پرەزيدەنت اكىمشىلىگى قۇرىلىمدىق بولىمشەلەرىنىڭ وكىلدەرى جانە بالا قۇقىقتارى جونىندەگى ۋاكىل قاتىستى.

جيىندا بالالاردىڭ قاۋىپسىزدىگىن قامتاماسىز ەتۋ جانە قۇقىقتارىن قورعاۋ، قۇقىق بۇزۋشىلىققا قارسى ءىس-قيمىل، جاس وسپىرىمدەر اراسىنداعى ءسۋيتسيدتىڭ الدىن الۋ جانە وعان جول بەرمەۋ بويىنشا جۇيەلى ءارى جەدەل ءىس-شارالاردى جۇزەگە اسىرۋ ماسەلەلەرى قارالدى.

ەرلان قارين بۇل پروبلەمالار مەملەكەتتىڭ ءجىتى نازارىندا ەكەنىن اتاپ ءوتتى. مەملەكەتتىك ورگاندار قاجەتتى ينستيتۋتسيونالدىق شەشىمدەر ازىرلەپ، سىن-قاتەرلەردىڭ الدىن الۋ تەتىكتەرى مەن الگوريتمدەرىن جاسادى.

مەملەكەتتىك كەڭەسشىنىڭ پىكىرىنشە، بالالاردىڭ قاۋىپسىزدىگىن قامتاماسىز ەتۋگە جانە ولاردى زاڭ تالاپتارىنا قايشى اقپاراتتان قورعاۋعا باعىتتالعان جۇمىستاردى جۇيەلى جۇرگىزۋدىڭ ماڭىزى زور. اتالعان شارالاردى جۇزەگە اسىرۋعا ازاماتتىق ينستيتۋتتاردى جانە اتا-انالاردى دا تارتقان ءجون.

جيىن سوڭىندا ەرلان قارين جاۋاپتى مەملەكەتتىك ورگاندار اراسىنداعى بايلانىستى نىعايتۋ جونىندە ناقتى تاپسىرمالار بەردى.

وسىعان دەيىن ەرلان قارين مەملەكەتتىك ورگاندار ىشكى ساياسات باعىتىنداعى جۇمىستارى اياسىندا اسكەري-پاتريوتتىق تاربيە بەرۋ بويىنشا جەكەلەگەن ءىس-شارالار ۇيىمداستىرۋدى قولعا العانىنا نازار اۋداردى.