مەملەكەتتىك بيۋجەتتىڭ كىرىسى ۇلعايدى

استانا. KAZINFORM - جەدەل دەرەكتەرگە سۇيەنسەك، 2025-جىلدىڭ قاڭتار-ءساۋىر ارالىعىندا مەملەكەتتىك بيۋجەتتىڭ كىرىسى 113,8 پايىز ورىندالدى. بۇل تۋرالى قارجى مينيسترلىگىنىڭ باسپا ءسوز قىزمەتى حابارلادى.

- جوسپار بويىنشا 6,7 تريلليون تەڭگە كوزدەلىپ، ءىس جۇزىندە 7,6 تريلليون تەڭگە ءتۇستى. جوسپار 925 ميلليارد تەڭگەگە ارتىق ورىندالدى. بىلتىرعى ۇقساس كەزەڭمەن سالىستىرعاندا مەملەكەتتىك بيۋجەتتىڭ كىرىسى 1,4 تريلليون تەڭگەگە نەمەسە 21,7 پايىزعا ارتتى، - دەلىنگەن قارجى مينيسترلىگى حابارلاماسىندا.

ونىڭ ىشىندە:

- رەسپۋبليكالىق بيۋجەتتىڭ كىرىستەرى بويىنشا جوسپار 102,3 پايىز ورىندالدى نەمەسە جوسپار بويىنشا 4,3 تريلليون تەڭگە بولجانىپ، ءىس جۇزىندە 4,4 تريلليون تەڭگە ءتۇستى. بىلتىرعى كەزەڭمەن سالىستىرعاندا ءوسىم قارقىنى 128,2 پايىز نەمەسە ابسوليۋتتى ماندە 971,3 ميلليارد تەڭگەگە ۇلعايدى.

- جەرگىلىكتى بيۋجەتتەردىڭ كىرىستەرى 134,5 پايىز ورىندالدى نەمەسە جوسپار بويىنشا 2,4 تريلليون تەڭگە بولجانىپ، ءىس جۇزىندە 3,2 تريلليون تەڭگە ءتۇستى. ءوسىم 2024-جىلداعى كەزەڭمەن سالىستىرعاندا 113,7 پايىز نەمەسە 387,2 ميلليارد تەڭگەگە ارتىق ورىندالدى.

- اتالعان كەزەڭدە قابىلدانعان سالىق جانە كەدەندىك اكىمشىلەندىرۋ مەن ولاردى سيفرلاندىرۋ جۇمىستارى ارقىلى قوسىمشا 300 ميلليارد تەڭگە ءتۇستى، - دەلىنگەن حابارلامادا.

ايتا كەتەلىك بيىل 10 مىڭ بيزنەس-باستاماعا قولداۋ كورسەتىلەدى.