مەملەكەتكە جەمقورلاردان 111 ميلليارد تەڭگە زالال كەلگەن

استانا. KAZINFORM - جىل باسىنان بەرى جەمقورلىقتان بيۋدجەتكە 111 ميلليارد تەڭگە زالال كەلگەن. بۇل بىلتىرمەن سالىستىرعاندا 2 ەسە كوپ.

شىعىننىڭ 96 ميللياردى قىزمەتىن اسىرا پايدالعانداردان كەلسە، 2 ميلليارد الاياقتىق جولمەن جىمقىرىلعان. قازىر ۇرلانعان قارجىنىڭ 5 جارىم ميلليارد تەڭگەدەن استامى ءوز ەركىمەن قايتارىلدى. بۇل تۋرالى Jibek Joly ارناسىنىڭ جاڭالىقتارىندا ايتىلدى.

كەيىنگى 3,5 جىلدا جەمقورلار جول قۇرىلىسىنا بولىنگەن قارجىنىڭ 9 ميلليارد تەڭگەسىن قالتاعا باسقان. تەك بىلتىر 5 وڭىردەگى سمەتالىق قۇجاتتا 5 ميلليارد تەڭگە ارتىق كورسەتىلگەن. سالدارىنان جولداردىڭ ساپاسى سىن كوتەرمەيدى. جاڭا اسفالتتاردىڭ ءوزى ءبىر جىل وتپەي ۇگىتىلىپ جاتىر. سوندىقتان سىبايلاس جەمقورلىققا قارسى ءىس- قيمىل اگەنتتىگى جول قۇرىلىسىنا قاتىستى مونيتورينگتى كۇشەيتتى. شەتەلدىك تاجىريبەگە سۇيەنىپ، جاعدايدى رەتتەۋدى كوزدەپ وتىر.

— ءبىز قازىر مەملەكەت باسشىسىنىڭ تاپسىرماسىمەن جول قۇرىلىسى كەزىندەگى جەمقورلىقتى قاراستىرىپ جاتىرمىز. بۇل رەتتە گونگونگتىڭ تاجىريبەسىن قولدانباقپىز. ولار جوبالىق-سمەتالىق قۇجاتتامانى تەكسەرۋدىڭ، بىردە ءبىر شىعىن بولماۋىنىڭ تىڭ ءادىسىن تاپقان، - دەدى قر سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اسحات جۇماعالي.

جومقورلىق ەلىمىزدىڭ اۋىل شارۋاشىلىعى، دەنساۋلىق ساقتاۋ، ءبىلىم سالالارىندا دا بەلەڭ الىپ تۇر. اگەنتتىكتىڭ مالىمەتىنشە، جىل باسىنان بەرى 800 دەن استام قىلمىستىق ءىس قوزعالعان. 600 دەي ادام ۇستالدى.

- سىبايلاس جەمقورلىقپەن كۇرەسۋدىڭ جالعىز جولى - زاڭسىز بايىعان مەملەكەتتىك قىزمەتكەرلەردى قىلمىستىق جاۋاپكەرشىلىككە تارتۋ. قازىر ولارداعى مۇلىكتىڭ قايدان كەلگەنىن سۇراساڭ جەكە باسىنا قاتىستى ماسەلەگە قول سۇقتىڭ دەپ ايىپتالاسىڭ. سوندىقتان زاڭدى وزگەرتۋ كەرەك، - دەيدى ساراپشى ديدار سماعۇلوۆ.

قازىر ءتيىستى زاڭ جوباسى ماجىلىستە قارالىپ جاتىر. جاڭا نورماعا جەمقورلاردىڭ جالپىعا بىردەي رەەستىرى دە ەنگىزىلۋى مۇمكىن.

- سىبايلاس جەمقورلىق ءورشىپ تۇر. مەملەكەتتىك قىزمەتكەرلەر جۇمىسقا ءوز تۋىستارىن عانا الادى. بۇل تۇرعىدا قىلمىستىق جاۋاپكەرشىلىكتى كۇشەيتۋ اسا ماڭىزدى، - دەيدى ق ر پارلامەنتى ءماجىلىسىنىڭ دەپۋتاتى مارات ءباشىموۆ.

ساراپشىلار جەمقورلىقتى تۇبەگەيلى جويماساق تا، ازايتۋدىڭ جولى - اشىقتىق دەيدى. ءبىراق جەمقورلاردىڭ ءوزى ەلدىڭ دامۋىنا كەدەرگى جاساپ وتىرعانىن تۇيسىنبەيىنشە جازا دا، كۇرەس تە ماسەلەنى شەشپەيتىنى انىق…

بۇعان دەيىن حابارلانعانداي، پرەمەر- مينيستر ولجاس بەكتەنوۆ سەنات دەپۋتاتتارىنىڭ كۆازيمەملەكەتتىك سەكتورداعى سىبايلاس جەمقورلىققا قارسى كومپلاەنس- قىزمەتتەردى اۋتسورسينگكە بەرۋ مۇمكىندىگىنە قاتىستى ساۋالىنا جاۋاپ بەرگەن بولاتىن.