مەملەكەت باسشىسىنىڭ اتىنان ب ا ق قىزمەتكەرلەرىنە باسپانا بەرىلدى
استانا. KAZINFORM - بۇگىن ەلوردادا ب ا ق قىزمەتكەرلەرى كۇنىنە وراي ەلىمىزدىڭ جەتەكشى بۇقارالىق اقپارات قۇرالدارىندا ەڭبەك ەتىپ جۇرگەن جۋرناليستەر مەن باسقا دا قىزمەتكەرلەرگە پاتەر سەرتيفيكاتتارى سالتاناتتى تۇردە تابىس ەتىلدى.
پاتەر كىلتىن العان ب ا ق سالاسىنىڭ 66 قىزمەتكەرى ەلوردادا جاڭادان بوي كوتەرگەن ءزاۋلىم ۇيلەردىڭ بىرىنە جۋىردا قونىستانادى. ماسس-مەديا ماماندارىنىڭ ايرىقشا ەڭبەگىن ايشىقتايتىن شارا «دارا» پرەزيدەنتتىك باستامالار قورىنىڭ ۇيىمداستىرۋىمەن ءوتتى.
مەملەكەت باسشىسىنىڭ تاپسىرماسى بويىنشا ب ا ق قىزمەتكەرلەرىنە سەرتيفيكاتتاردى ق ر پرەزيدەنتىنىڭ كەڭەسشىسى –باسپا ءسوز حاتشىسى رۋسلان جەلدىباي تاپسىردى.
- 2023-جىلدان باستاپ مەملەكەت باسشىسىنىڭ تاپسىرماسىنا سايكەس جۋرناليستەرگە باسپانا بەرۋ ىسكە اسىرىلىپ كەلەدى. بۇل ءوز كەزەگىندە جاقسى داستۇرگە اينالدى. 2023-جىلى 65 پاتەر تاپسىرىلسا، 2024-جىلى 67 پاتەر بەرىلدى. ال بيىل 66 پاتەردى تاپسىرماقپىز، - دەدى ر. جەلدىباي.
وسى ورايدا ول پرەزيدەنت وتاندىق ب ا ق- تى، تىلشىلەردى قولداۋعا نازار اۋدارىپ وتىرعانىن ايتتى.
- سوندىقتان ءبىز وسى يگى ءداستۇردى كەلەسى جىلى دا جالعاستىرامىز. جۋرناليستەرگە عانا ەمەس، سونداي-اق وتاندىق مەديادا ۇلكەن قىزمەت اتقاراتىن رەجيسسەر، وپەراتور، كوررەكتور جانە باسقا دا مامانداردى ۇمىتپايمىز. وسى ادامدارعا بيىل دا پاتەر كىلتى تاپسىرىلادى. ءبىز ازاماتتاردىڭ الەۋمەتتىك جاعدايىنا ەرەكشە قارادىق. بۇگىنگى تىزىمدە كوپبالالى، مۇگەدەكتىگى بار بالانى تاربيەلەپ وتىرعان وتباسىلار قامتىلعان، - دەدى ق ر پرەزيدەنتىنىڭ كەڭەسشىسى –باسپا ءسوز حاتشىسى.
سونىمەن قاتار «دارا» پرەزيدەنتتىك باستامالار قورىنىڭ پرەزيدەنتى مۇحامەدقالي تاۋان ب ا ق قىزمەتكەرلەرىن قۇتتىقتادى. 2022-جىلى قۇرىلعان قوردىڭ قىزمەتى قازاقستاندا كرەاتيۆتى سەكتوردى دامىتۋعا، ازاماتتاردىڭ شىعارماشىلىق الەۋەتىن ىسكە اسىرۋ ءۇشىن قولايلى جاعداي جاساۋعا، جاڭا جۇمىس ورىندارىن اشۋعا باعىتتالعان.
بۇدان بۇرىن حابارلانعانداي، وسى اپتادا پرەزيدەنت قاسىم- جومارت توقايەۆ وتاندىق جۋرناليستيكا سالاسىنىڭ دامۋىنا ەلەۋلى ۇلەس قوسقان ءبىر توپ ازاماتتى مەملەكەتتىك ناگرادالارمەن ماراپاتتادى.