مەملەكەت باسشىسى تۋريزمنىڭ قارقىندى دامۋىنا جول اشاتىن باعىتتاردى اتادى

استانا. KAZINFORM - پرەزيدەنت تۋريزم - ماڭعىستاۋ ايماعى ەكونوميكاسىنىڭ مۇناي-گاز سالاسىنان كەيىنگى ماڭىزدى سەكتورى ەكەنىن ايتتى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى قاسىم-جومارت توقايەۆتىڭ توراعالىعىمەن ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەس ءوتىپ جاتىر. كەڭەستە بىلتىر وبلىسقا شەتەلدەن 43 مىڭ تۋريست كەلگەنىن ايتتى.

- بەسىنشى. تۋريزم - ايماق ەكونوميكاسىنىڭ مۇناي-گاز سالاسىنان كەيىنگى ماڭىزدى سەكتورى. بىلتىر وبلىسقا شەتەلدەن 43 مىڭ تۋريست كەلدى. ەلىمىزدىڭ باسقا ايماقتارىنان كەلگەن قوناقتاردىڭ سانى 460 مىڭعا جۋىقتادى. سوڭعى ءۇش جىلدا جالپى تۋريستەر سانى 1,5 ەسە ارتتى. جازدا قوناق ۇيلەردىڭ 90 پايىزدان استامى بوس بولمايدى. بەكەت اتا جەراستى مەشىتىنە، بوزجىرا شاتقالىنا، ايراقتىداعى «قامالدار القابىنا» جانە تورىشتاعى دومالاق تاستارعا تۋريستەر وتە كوپ بارادى. ماڭعىستاۋعا كەلەتىن ءاربىر ونىنشى ادام وسى نىساندارعا ارنايى سوعادى، - دەدى ول.

پرەزيدەنت تۋريستەرگە، اسىرەسە، مۇمكىندىگى شەكتەۋلى جاندارعا قولايلى جاعداي جاساۋ قاجەت ەكەنىن اتاپ ءوتتى.

- مەن مۇنى ۇنەمى ايتىپ ءجۇرمىن. وسى باعىتتاعى جۇمىستى جالعاستىرۋ قاجەت. بەكەت اتا جەراستى مەشىتىنە كوتەرىلۋ ءۇشىن اۆتوماتتى قوندىرعى ورناتۋ تۋرالى ۇسىنىستى مۇقيات قاراۋ كەرەك. جالپى، تۋريستىك نىساندارعا سونداي جۇيە ورناتۋ الەمدىك تاجىريبەدە بار. ءبىراق كەسەنە - حالقىمىز ءۇشىن كيەلى ورىن. سوندىقتان جۇرتشىلىقپەن، ءتۇرلى ماماندارمەن اقىلداسىپ، جان-جاقتى ويلاستىرىپ شەشىم قابىلداعان ءجون. مەن بۇل ۇسىنىستى قولدايمىن، - دەدى توقايەۆ.

مەملەكەت باسشىسى اقتاۋ - كولىك-لوگيستيكا، تۋريزم تۇرعىسىنان بىرەگەي قالا ەكەنىن ايتتى.

- مەن بىلتىر تۋريزمدى دامىتۋ جونىندەگى جيىندا الەۋەتى زور باعىتتاردى اتاپ ءوتتىم. ال ناقتى اقتاۋعا كەلەتىن بولساق، بۇل - كولىك- لوگيستيكا، تۋريزم تۇرعىسىنان بىرەگەي قالا. بۇل الەۋەتتى ءتيىمدى پايدالانۋىمىز كەرەك. سونداي-اق تەڭىز تۋريزمىنە باسا نازار اۋدارۋ قاجەت. بەس ەلدىڭ تەڭىز ايلاقتارى ءبىر-بىرىنە جاقىن ورنالاسقان. رەسەي، يران جانە كاۆكاز ەلدەرىنىڭ ميلليوننان استام تۇرعىنى بار 10 قالاسىنان تۋريستەر شاقىرۋعا بولادى. ىستانبۇل، انتاليا، لوندون، ماسكەۋ، استراحان، تبيليسي، باكۋ جانە باسقا دا قالالاردان شىعاتىن ۇشاقتاردىڭ ترانزيتتىك دالىزدەرى وسى جەردە توعىسادى. مۇنىڭ ءبارى تۋريزمنىڭ قارقىندى دامۋىنا جول اشادى. اقتاۋ پورتىندا جاڭا تەڭىز پورتىن سالۋ قاجەتتىگى تۋىنداپ وتىر. ايلاقتاردى جولاۋشى تاسيتىن كەمەلەر توقتاۋعا بولاتىنداي ەتىپ جاڭعىرتۋ كەرەك، - دەدى ول.

سونىمەن قاتار پرەزيدەنت تۋريزم سالاسىنا جەكە ينۆەستيتسيا تارتۋ ماسەلەسىنە توقتالدى.

- ۇكىمەت «ماڭعىستاۋ» تۋريستىك ايماعىن دامىتۋدىڭ كەشەندى جوسپارىن شۇعىل تۇردە ءبىتىرۋى كەرەك. ماۋسىم ايىندا بۇل جوسپاردى ماقۇلدايمىز. وبلىس اكىمدىگى ۇكىمەتتىڭ قولداۋىمەن وسى سالاعا جەكە ينۆەستيتسيا تارتۋ ماسەلەسىن پىسىقتاۋى قاجەت. تاعى ءبىر ماسەلە، بۇل - ءىس-شارالار تۋريزمى (Event tourism) . اقتاۋ تۇركى الەمىنىڭ مادەني استاناسى مارتەبەسىن الدى. جاقىندا اشىلۋ ءراسىمى جاقسى ءوتتى. بۇل ءىس-شاراعا ءوز ازاماتتارىمىزبەن قاتار، تۇركىتىلدەس ەلدەر دە زور قىزىعۋشىلىق تانىتتى. الداعى ۋاقىتتا 30 دان استام ءىس-شارا وتكىزىلەدى. وسىنىڭ ءبارى ايماققا تۋريستەر تارتۋعا جول اشۋعا ءتيىس. بۇل جۇمىستى بەلسەندى جۇرگىزۋ قاجەت. جالپى، ايماققا شەتەل ينۆەستيتسياسى تۇراقتى كەلىپ جاتىر. ءبىراق ونىڭ ۇشتەن ەكىسى مۇناي-گاز سەكتورىنا تيەسىلى. سوندىقتان باسقا دا سالالارعا بەلسەندى تۇردە ينۆەستور تارتۋ قاجەت، - دەدى توقايەۆ.

ايتا كەتەيىك، مەملەكەت باسشىسى قاسىم-جومارت توقايەۆتىڭ توراعالىعىمەن ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەس ءوتىپ جاتىر.

پرەزيدەنت ۇكىمەت پەن «سامۇرىق-قازىنا» قورىنا ايماقتاعى سۋ تاپشىلىعىن ازايتۋ ءۇشىن ناقتى شەشىم قابىلداۋدى تاپسىردى.

توقايەۆ جاڭاوزەندەگى گاز وڭدەۋ زاۋىتى قۇرىلىسىنىڭ كەشىگۋى - ۇكىمەتتىڭ ورەسكەل ولقىلىعى ەكەنىن اتاپ ءوتتى.