مەملەكەت باسشىسى تۇرعىن ءۇي ساياساتىن رەفورمالاۋعا قاتىستى زاڭعا قول قويدى
استانا. KAZINFORM - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي ساياساتىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
زاڭ ازاماتتاردىڭ، قانداستاردىڭ تۇرعىن ءۇي جاعدايلارىن جاقسارتۋعا قاتىستى مەملەكەتتىك قولداۋ تەتىكتەرىن جەتىلدىرۋگە باعىتتالعان.
تۇزەتۋلەردىڭ ءبىرىنشى بلوگى مەملەكەت باسشىسىنىڭ تاپسىرماسىنا سايكەس، وتباسى بانكىنىڭ نەگىزىندە تۇرعىن ءۇي كەزەگىنە قويۋدى، ەسەپكە الۋدى جانە ءبولۋدى ءبىر ورتالىقتان جۇزەگە اسىراتىن كەشەندى دامۋ جانە قولداۋ ينستيتۋتىن قۇرۋدى كوزدەيدى.
سونىمەن قاتار وتباسى بانكى جەكە تۇرعىن ءۇي قورىنان جالعا الىنعان تۇرعىن ءۇي ءۇشىن جالداۋ اقىسىنىڭ ءبىر بولىگىن سۋبسيديالاۋدى، جەڭىلدەتىلگەن يپوتەكالىق تۇرعىن ءۇي قارىزدارىن بەرۋدى جالعاستىرادى.
وتباسى بانك تۇرعىن ءۇيدى ءبولۋ كەزىندە باسپاناعا مۇقتاج ازاماتتاردى ەسەپكە قويۋ كۇنى مەن تابىس دەڭگەيىن ەسكەرەدى. بۇل، ءبىرىنشى كەزەكتە، تۇرعىن ءۇي كەزەگىندە ۇزاق ۋاقىتتان بەرى تۇرعان ادامداردى باسپانامەن قامتۋعا مۇمكىندىك بەرەدى.
تۇزەتۋلەردىڭ ەكىنشى بلوگىندا تۇرعىن ۇيگە مۇقتاج ادامدار ءۇشىن قوسىمشا كەپىلدىكتەر ەنگىزۋ قاراستىرىلعان.
تۇزەتۋلەردىڭ ءۇشىنشى بلوگى مەملەكەتتىك قولداۋ شارالارى اياسىندا بەرىلگەن تۇرعىن ءۇيدى يەلەنۋ جانە پايدالانۋ تەتىگىن رەگلامەنتتەيتىن ەرەجەلەردى تولىقتىرىپ، ناقتىلايدى.
تۇزەتۋلەردىڭ ءتورتىنشى بلوگى جەر زاڭناماسىنىڭ جەكەلەگەن ەرەجەلەرىن، قۇرىلىس، جەكە تۇلعالاردىڭ دەپوزيتتەرىنە كەپىلدىك بەرۋ سالاسىنداعى زاڭنامالاردى جەتىلدىرۋگە باعىتتالعان.
زاڭنىڭ ءماتىنى باسپا سوزدە جاريالانادى.
وسىعان دەيىن مەملەكەت باسشىسى سوت جۇيەسىن رەفورمالاۋعا قاتىستى زاڭعا قول قويعانى تۋرالى جازدىق.