مەملەكەت باسشىسى سەربيا پرەمەر-مينيسترىمەن كەزدەستى

بەلگراد. KAZINFORM - بەلگرادقا رەسمي ساپارى اياسىندا قاسىم-جومارت توقايەۆ سەربيا رەسپۋبليكاسىنىڭ پرەمەر-ءمينيسترى ميلوش ۆۋچيەۆيچپەن كەزدەسۋ وتكىزدى. بۇل تۋرالى اقوردانىڭ باسپا ءسوز قىزمەتى مالىمدەدى.

اڭگىمەلەسۋ بارىسىندا مەملەكەت باسشىسى پرەزيدەنت الەكساندر ۆۋچيچپەن مازمۇندى كەلىسسوزدەر جۇرگىزگەنىن اتاپ ءوتتى.

- سەربيامەن بەرىك دوستىققا جانە ءوزارا تۇسىنىستىككە نەگىزدەلگەن ۇزاق جىلعى سەرىكتەستىگىمىز بەن كوپجاقتى بايلانىسىمىزدى جوعارى باعالايمىز. بۇگىن عارىش، تەلەكوممۋنيكاتسيا، اۋىل شارۋاشىلىعى، قورعانىس ونەركاسىبى، ءبىلىم، تۋريزم سالالارىندا ۇكىمەتارالىق جانە ۆەدومستۆوارالىق ءبىرقاتار ماڭىزدى كەلىسىمگە قول قويىلدى. ءتۇرلى دەڭگەيدەگى تۇراقتى ساياسي ديالوگ پەن ەكونوميكالىق ءوزارا ىقپالداستىق ءبىزدىڭ تۇپكى مۇددەمىزگە ساي كەلەدى، - دەدى قازاقستان پرەزيدەنتى.

Фото: Ақорданың баспасөз қызметі

مەملەكەت باسشىسى قازاقستان مەن سەربيا ۇكىمەتتەرىن قول جەتكىزگەن ۋاعدالاستىقتاردى ساپالى جۇزەگە اسىرۋ ءۇشىن بىرلەسە ارەكەت ەتۋگە شاقىردى. اتاپ ايتقاندا، ەكىجاقتى ەكونوميكالىق جانە ينۆەستيتسيالىق ىنتىماقتاستىققا تىڭ سەرپىن بەرەتىن ءىرى جوبالاردى ناقتىلاۋ قاجەت ەكەنىن ايتتى.

بۇل ورايدا قاسىم-جومارت توقايەۆ ساۋدا- ەكونوميكالىق ىنتىماقتاستىق بويىنشا ۇكىمەتارالىق كوميسسيا مەن ىسكەرلىك كەڭەس جۇمىسىنا زور ءۇمىت ارتاتىنىن جەتكىزدى.

مەملەكەت باسشىسى ەلىمىزدە ينۆەستيتسيالىق جوبالاردى جۇزەگە اسىراتىن سەربيا بيزنەسمەندەرىنە قازاقستان ۇكىمەتى تولىعىمەن قولداۋ كورسەتۋگە دايىن ەكەنىن مالىمدەدى.

ميلوش ۆۋچيەۆيچ بەلگرادتىڭ قازاقستانداعى ساياسي جانە الەۋمەتتىك- ەكونوميكالىق رەفورمالاردى مۇقيات زەردەلەپ، سونداي-اق ءبىرقاتار پەرسپەكتيۆتى باعىت بويىنشا بايلانىستى نىعايتۋ مۇمكىندىگىن قاراستىرىپ جاتقانىنا توقتالدى.

سەربيا پرەمەر-ءمينيسترى ءوز ەلىنىڭ قازاقستانمەن تاۋار اينالىمىن ۇلعايتۋعا، ساۋدا- ەكونوميكا، كولىك- لوگيستيكا جانە ينۆەستيتسيا سالالارىنداعى ەكىجاقتى ىقپالداستىقتى جانداندىرۋعا نيەتتى ەكەنىن راستادى.

ميلوش ۆۋچيەۆيچ «جاسىل» تەحنولوگيا، قۋات كوزدەرىن الماستىرۋعا قاتىستى ماسەلەلەردى قوزعاپ، وسى باعىتتا تاجىريبە بولىسۋگە شاقىردى. سونىمەن قاتار ەكى ەلدە ءبىر-ءبىرىنىڭ مادەني كۇندەرىن ۇيىمداستىرۋدى جانە بيزنەس-فورۋمداردى تۇراقتى تۇردە وتكىزۋدى ۇسىندى.

اۆتور

اينۇر تۋماكبايەۆا