مەملەكەت باسشىسى پرەمەر- مينيستر ولجاس بەكتەنوۆتى قابىلدادى

استانا. KAZINFORM - قاسىم-جومارت توقايەۆقا ەلىمىزدە ورنىقتى الەۋمەتتىك-ەكونوميكالىق دامۋدى قامتاماسىز ەتۋگە باعىتتالعان ەكونوميكانى ءارتاراپتاندىرۋ جانە قۇرىلىمدىق جاڭعىرتۋ بويىنشا قابىلدانىپ جاتقان شارالار تۋرالى ەسەپ بەرىلدى. بۇل تۋرالى اقوردانىڭ باسپا ءسوز قىزمەتى حابارلادى.

پرەزيدەنت تاپسىرمالارىن جۇزەگە اسىرۋ اياسىندا جالپى ينۆەستيتسيا كولەمى 2,3 تريلليون تەڭگەدەن اساتىن ءارى شامامەن 20 مىڭ جۇمىس ورنىن قۇرۋدى كوزدەيتىن 45 ءىرى ونەركاسىپتىك جوبا ىسكە اسىرىلىپ جاتىر.

پرەمەر- مينيستر قاۋىپسىزدىك كەڭەسىنىڭ وتىرىسىندا كولىك سالاسىن دامىتۋعا قاتىستى مەملەكەت باسشىسى جۇكتەگەن مىندەتتەردى ورىنداۋ بويىنشا قولعا الىنعان جۇمىستار جونىندە باياندادى.

پرەزيدەنتكە ۆەگەتاتسيالىق كەزەڭ تۋرالى مالىمەت ۇسىنىلدى. ەگىستىكتى سۋ رەسۋرستارىمەن قامتاماسىز ەتۋ، اۋىل شارۋاشىلىعى ماسەلەلەرى تۇراقتى باقىلاۋعا الىنىپ، سۋ ۇنەمدەۋ تەحنولوگيالارى ەنگىزىلىپ جاتىر. وڭىرلىك شتابتار جۇمىس ىستەپ جاتىر.

مەملەكەت باسشىسىنا ەگىس ناۋقانىنىڭ اياقتالۋى جانە جيىن-تەرىم جۇمىستارىنا دايىندىق بارىسى جونىندە ايتىلدى. ەلىمىزدەگى جالپى ەگىس القابى 23,7 ميلليون گەكتاردى قۇرادى. شارۋالارعا تولىق كولەمدە قولداۋ كورسەتىلىپ جاتىر. جىل باسىنان بەرى اۋىل، ورمان جانە بالىق شارۋاشىلىعىنداعى ونىمدەر مەن قىزمەتتەردىڭ جالپى كولەمى 4 پايىزعا ءوستى. بارلىق وڭىردە وڭ ديناميكا تىركەلدى.

سونىمەن قاتار ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋ، سيفرلىق ترانسفورماتسيالاۋ جونىندە اقپارات بەرىلدى.

كەزدەسۋ سوڭىندا قاسىم-جومارت توقايەۆ ەكونوميكادا ينستيتۋتسيونالدىق وزگەرىستەر جاساۋعا، وڭىرلەردى دامىتۋعا جانە ينۆەستيتسيا تارتۋعا قاتىستى ءبىرقاتار تاپسىرما بەردى.

ايتا كەتەيىك، پرەمەر-مينيستر ولجاس بەكتەنوۆ سەنات دەپۋتاتتارىنىڭ بالالار ادەبيەتىن دامىتۋعا ارنالعان ۇلتتىق ستراتەگيا قابىلداۋ ۇسىنىسىنا جاۋاپ بەردى.