مەملەكەت باسشىسى Nauryz Fest فەستيۆالىن تاماشالادى
الماتى. KAZINFORM - پرەزيدەنت قاسىم-جومارت توقايەۆ الماتىداعى «اباي» الاڭىندا ءوتىپ جاتقان حالىقارالىق Nauryz Fest فەستيۆالىنە باردى.
بۇل شىعارماشىلىق شارا ناۋرىز مەيرامىن تويلايتىن ەلدەردىڭ - قازاقستان، قىرعىزستان، وزبەكستان، ازەربايجان، تاجىكستان، تۇركيا، موڭعوليا جانە باشقۇرتستاننىڭ مادەنيەتى مەن ءداستۇرىن ءبىر شاڭىراق استىنا بىرىكتىردى.
شەتەلدىك قوناقتار وزدەرىنىڭ دەكوراتيۆتى- قولدانبالى ونەر تۋىندىلارىن، داستۇرلەرى مەن ادەت- عۇرىپتارىن تانىستىرىپ، حالىق اندەرىن شىرقادى.
الاڭدا شاراعا قاتىسۋشى ەلدەردىڭ شاتىر-شەبەرحانالارى، ۇلتتىق تاعام پاۆيلوندارى، كيىز ۇيلەر تىگىلگەن قازاق ەتنواۋىلى، ينتەراكتيۆتى الاڭقايلار، بالالار شىعارماشىلىعى جانە روبوتتى تەحنيكا ايماعى، ينستاللياتسيالار، شاعىن ساۋلەت نىساندارى مەن كومپوزيتسيالار ورناتىلعان.
فەستيۆال باعدارلاماسى اياسىندا مۋزىكالىق ۇجىمدار شەرۋى، تەاترلاندىرىلعان قويىلىمدار، وتاندىق جانە شەتەلدىك قولونەرشىلەر جارمەڭكەسى جانە «قامشى» اتتى كورمە ۇيىمداستىرىلدى.
مەملەكەت باسشىسىنا وقۋشىلاردىڭ روبوتتى تەحنيكا سالاسىنداعى وزىق ازىرلەمەلەرىن كورسەتەتىن يننوۆاتسيالىق الاڭ - «روبو- كيىز ءۇي» تانىستىرىلدى.
بۇل جۇمىستى الماتى قالاسىنداعى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىنىڭ وقۋشىلارى، Global Challenge 2023 چەمپيوناتىنىڭ ءابسوليۋتتى جەڭىمپازدارى دامەلى شايمەردەنوۆا، يمانالى كوكسال، سەرگەي گاپونوۆ، نۇرسۇلتان جانۇزاقوۆ، نۇريسلام تۇرعىنباي ازىرلەگەن.